Uniondeb Academaidd
Gallwch gael rhagor o wybodaeth am yr hyn i’w wneud ac i’w osgoi o ran Uniondeb Academaidd, sydd wedi'i theilwra i'ch cyfadran, yng nghwrs 3 yn y gyfres o gyrsiau ar-lein "Llwyddiant Academaidd: Sgiliau ar gyfer Dysgu, Sgiliau am Oes”.
I gael mynediad at y cynnwys priodol, dilynwch y ddolen uchod, a dewiswch eich cyfadran o'r rhestr. yna dewiswch 'Cwrs 3: Uniondeb Academaidd' i agor y cwrs yn Canvas.
Beth mae Uniondeb Academaidd yn ei olygu?
Pan fyddwn yn ymrwymo i gynnal Uniondeb Academaidd, rydym yn cytuno y byddwn yn gwneud y canlynol:
Rydym yn onest yn ein gwaith
Talwn deyrnged lle bo’n addas
Gwnawn hyn trwy gyfeirio at unrhyw ffynonellau wybodaeth, syniadau a gwaith sy’n dylanwadu neu gyfrannu at ein gwaith. Mae cyfeirnodi’n gywir at ffynonellau, boed yn ysgrifenedig, weledol neu ar lafar, yn ymarfer elfennol mewn ysgrifennu ac ymchwil academaidd. Mae’n cydnabod cyfraniadau eraill ac yn galluogi darllenwyr i wirio ac ymchwilio ffynonellau.
Mae’r fideos olynol gan y Ganolfan Llwyddiant Academaidd yn ddefnyddiol er mwyn dysgu sut i ymarfer yr egwyddorion hyn:
Mae’r Llyfrgell hefyd yn cynnig canllawiau cyfeirio manwl ar gyfer pob arddull cyfeirio. Os nad ydych yn siŵr pa arddull gyfeirnodi yr ydych i fod i'w ddefnyddio, gallwch chwilio am eich canllaw pwnc o’r llyfrgell, neu ofyn i'ch darlithwyr.
Byddwn yn cydweithio pan fo’n briodol
Cefnogir gwaith cydweithredol yn academia, ar yr amod ei fod yn cael ei weithredu yn unol â’r canllawiau a gyhoeddir gan y Brifysgol. Cytunwn ei fod yn iawn i weithio ar y cyd ar brosiectau grŵp, a’i fod yn iawn i weithio’n annibynnol ar aseiniadau unigol. Cytunwn hefyd, pan fyddwn yn gweithio gyda’n gilydd, bod pawb yn y grŵp yn cyfrannu ar y cynnyrch gorffenedig, a bod pob un yn derbyn cydnabyddiaeth briodol.
Mae gan y Ganolfan Llwyddiant Academaidd gyfres ddefnyddiol o fideos ar weithio mewn grwpiau.
Byddwn yn parchu Eiddo Deallusol
Mae parchu hawlfreintiau a hawliau eiddo deallusol eraill yn hanfodol. Rydym yn sicrhau’r caniatâd cywir er mwyn defnyddio deunyddiau dan hawlfraint, ac yn cadw ar unrhyw gytundebau trwyddedu perthnasol.
Gallwch ddod o hyd i wybodaeth ar faterion hawlfraint yng Nghanllawiau Hawlfraint y Llyfrgell. Mae hyn yn cynnwys cyngor ar eiddo deallusol, a sut i ddod o hyd a defnyddio delweddau, cerddoriaeth a chynnwys arall yn eich gwaith.
Rydym yn ymchwilwyr moesegol
Wrth gynnal gwaith ymchwil, rydym yn dilyn canllawiau moesegol, yn derbyn unrhyw ganiatâd sydd ei hangen, ac yn adrodd ar ein canlyniadau ymchwil a dulliau yn fanwl gywir. Rydym yn cydymffurfio ag unrhyw ddeddfau, canllawiau, a pholisïau sefydliadol priodol, ac yn datgelu unrhyw wrthdrawiadau diddordeb. Rydym yn cytuno i ddiweddaru ein hymwybyddiaeth o safonau moesegol ac ymarferion da yn ein meysydd.
Mae tudalen we ar gael ar sut i ddefnyddio system moeseg ymchwil ar-lein y Brifysgol.
Camymddwyn Academaidd
Camymddwyn Academaidd yw pan fydd myfyriwr yn gweithredu mewn ffordd sy’n rhoi mantais annheg iddo ef neu i fyfyriwr arall. Mae hyn yn berthnasol os bydd yn gweithredu ar ei ben ei hun neu gydag eraill i wneud hyn.
Gall hyn ddigwydd mewn unrhyw asesiad y mae myfyriwr yn ei sefyll er mwyn derbyn ei gymhwyster ym Mhrifysgol Abertawe.
Gall myfyrwyr gyflawni camymddwyn academaidd yn fwriadol neu’n anfwriadol felly mae’n bwysig eich bod chi’n ymwybodol o’r hyn a ystyrir yn dramgwydd gan y Brifysgol. Gallwch ddod o hyd i'r holl ddogfennau polisi a Chwestiynau Cyffredin perthnasol ymhellach i lawr y dudalen hon, neu edrych ar yr enghreifftiau canlynol:
Enghreifftiau o Gamymddwyn Academaidd
Ystyr llên-ladrad yw defnyddio, heb gydnabyddiaeth, waith rhywun arall a’i gyflwyno i'w asesu fel pe bai'n briod waith.
Enghraifft o lên-ladrad yw copïo darn o destun gair am air o ffynhonnell arall heb gydnabod yr awdur(on) gwreiddiol. Gall llên-ladrad ddigwydd hefyd pan fyddwch chi’n defnyddio syniad rhywun arall, yn ei fynegi yn eich geiriau eich hun ond yn methu cydnabod y ffynhonnell wreiddiol. Ymhlith yr enghreifftiau eraill y mae defnyddio ffigurau, meddalwedd, diagramau, deunyddiau o'r rhyngrwyd neu waith myfyriwr arall ond heb gydnabod y rhain.
Dylid nodi y bydd hyn yn cael ei ystyried a'i drin o hyd fel llên-ladrad, ni waeth a fydd yn digwydd yn fwriadol neu'n anfwriadol. Dyma pam ei bod hi’n bwysig dysgu pryd a sut i gydnabod ffynonellau, defnyddio dyfyniadau uniongyrchol ac aralleirio ffynonellau yn fanwl-gywir ac mewn ffordd gywir.
Mae gan y Ganolfan Llwyddiant Academaidd fideos defnyddiol am Ddefnyddio Dyfyniadau Uniongyrchol yn eich Gwaith, ac Aralleirio. Gallwch hefyd ddod o hyd i ganllawiau ar gyfeirnodi gan y Llyfrgell.
Comisiynu gwaith yw pan fydd myfyriwr yn trefnu i rywun arall gyflawni darn o waith ar ei ran. P'un a yw'r gwaith hwn yna'n cael ei gyflwyno fel eu gwaith ei hun ai peidio, a p'un a yw'r myfyriwr yn talu am y gwaith gydag arian neu nwyddau neu wasanaethau ai peidio, mae unrhyw drefniant i rywun arall greu gwaith ar eich rhan yn cael ei ystyried fel comisiynu.
Yn ystod y blynyddoedd diwethaf mae marchnad ‘melinau traethodau’ wedi tyfu’n gyflym iawn. Mae'r rhain yn gweithio drwy godi tâl ar fyfyrwyr yn gyfnewid am ysgrifennu traethodau. Afraid dweud bod hyn yn cyfrif fel camymddygiad academaidd: nid priod waith y myfyriwr yw'r gwaith ac felly nid yw'r myfyriwr wedi mynd trwy'r broses ofynnol o ymchwilio a mynegi syniadau sy'n hwyluso dysgu.
Mae goblygiadau’r math hwn o dwyllo ‘yn sgîl contract’ yn rhai difrifol a’r gosb safonol yn sgîl comisiynu gwaith yw canslo pob marc modiwl ar draws lefel yr astudio a thynnu’n ôl o’r brifysgol.
Er y bydd myfyriwr sy'n ystyried comisiynu gwaith, gan gynnwys twyllo yn sgîl contract, yn tybio hwyrach nad oes fawr o debygolrwydd y bydd yn cael ei ddal, y gwrthwyneb sy’n wir mewn gwirionedd. Mae astudiaethau wedi dangos bod darlithwyr wedi adnabod mwy na 60% o ‘draethodau a gomisiynwyd’ yn gywir gan na fydd y sawl sy’n ysgrifennu’r traethawd wedi cael mynediad at yr un darlithoedd a’r un deunyddiau â’r myfyriwr. Ar ben hynny, bydd ysgrifenwyr y melinau traethodau yn aml yn ailddefnyddio gwaith traethodau blaenorol ar bynciau tebyg ac mae hyn yn golygu bod tebygolrwydd go dda y bydd Turnitin yn darganfod aseiniad o’r fath.
Mae cwmnïau twyllo dan gontract fel arfer yn ddiegwyddor hefyd; mae rhai achosion lle mae myfyrwyr wedi derbyn e-byst bygythiol gan gwmnïau twyllo dan gontract, yn gofyn am fwy o daliadau iddynt beidio â dweud wrth brifysgol bod y traethawd wedi'i brynu.
I gael rhagor o wybodaeth am beryglon defnyddio melinau traethodau, gwyliwch y cyfweliad hwn gyda'r Athro Michael Draper, neu edrychwch ar yr erthygl ganlynol i gael gwybod rhagor am y peryglon yn sgîl defnyddio melinau traethodau:
Yn y rhan fwyaf o bynciau, disgwylir i chi aralleirio ffynonellau yn amlach na'u dyfynnu. Mae hyn oherwydd bod angen i ddarlithwyr weld bod myfyriwr yn deall y deunydd ac yn gallu ei esbonio yn ei eiriau ei hun. Os ydych yn defnyddio meddalwedd i wneud hyn, rydych yn colli'r broses werthfawr o esbonio sy'n helpu gwreiddio dealltwriaeth.
Gall meddalwedd aralleirio fod yn ddefnyddiol mewn cyd-destunau penodol (fel man cychwyn ar gyfer deall erthyglau cymhleth) ond dylid ei ddefnyddio â gofal. Os yw myfyriwr yn cyflwyno aralleiriad wedi'i greu gan feddalwedd fel rhan o'i waith, mae’n honni bod yn awdur yr aralleiriad hwnnw. Mae hyn yn cael ei ystyried yn gamymddygiad academaidd. Cofiwch, mae angen i'r holl waith rydych chi'n ei gyflwyno, yn cynnwys aralleiriadau, fod yn eich geiriau eich hun.
Gall ddefnyddio meddalwedd aralleirio hefyd gael goblygiadau ar ansawdd eich gwaith, oherwydd er y gallai gynnig aralleiriad ar gyfer brawddeg, ni fydd o angenrheidrwydd yn deall cyd-destun llawn yr wybodaeth.
Yn olaf, yn debyg i dwyllo dan gontract, mae gwaith sy'n defnyddio'r math hwn o feddalwedd yn fwy tebygol o gael ei ganfod gan Turnitin, gan yn aml y bydd yn dehongli deunydd ffynhonnell yn yr un modd.
Mae gan y Ganolfan Llwyddiant Academaidd fideo defnyddiol am Aralleirio.
Gall gymryd rhan mewn grwpiau astudio a gweithio gyda chyfoedion fod yn gynhyrchiol ac mae'n cael ei annog. Fodd bynnag, o ran asesiadau unigol, mae'n bwysig sicrhau bod yr holl waith yn cael ei wneud gan yr unigolyn. Mae cydgynllwynio'n digwydd pan fydd myfyrwyr yn cydweithio, heb ganiatâd, i lunio darn o waith i'w asesu, ond yna'n cyflwyno'r deunyddiau fel eu gwaith nhw heb gydnabod cyfraniadau gan y cychwynwyr.
Pan fyddwch chi’n sefyll arholiad ar-lein neu yn y fan a’r lle, bydd cyfres o reoliadau y mae'n rhaid ichi eu dilyn. Er mwyn cynnal Gonestrwydd Academaidd, mae'n bwysig cymryd sylw manwl o'r rheoliadau hyn gan sicrhau eich bod yn eu dilyn.
Ymhlith yr enghreifftiau o arferion y dylid eu hosgoi y mae dod â deunyddiau a dyfeisiau nad ydyn nhw wedi cael eu hawdurdodi i mewn i'r ystafell arholi, cyfathrebu â phobl eraill heb ganiatâd goruchwyliwr, personadu ymgeisydd arholiad neu ganiatáu ichi’ch hun gael eich personadu a chyflwyno tystiolaeth ffug o amgylchiadau arbennig gerbron byrddau arholi.
Y peth gorau yw gadael eich ffôn y tu allan i'r ystafell, dylech chi osgoi achosion o gyfathrebu heb ganiatâd â phobl eraill, a dylech chi fod yn onest ynghylch pwy ydych chi ac amgylchiadau a allai effeithio ar eich perfformiad yn ystod yr arholiad.
Dylech chi gyfeirio at Reoliadau Arholi Prifysgol Abertawe yma i gael rhagor o wybodaeth:
Bydd ffugio yn digwydd pan fydd ymchwilydd yn ffugio canlyniadau labordy, gwaith maes neu fathau eraill o gasglu a dadansoddi data. Mae hyn hefyd yn gyfystyr â chamymddygiad academaidd.
Am gymorth ymchwil sy'n ymwneud â moeseg, gallwch e-bostio eich ymholiadau at y timau canlynol:
Mae llawer o ddefnydd posib ar gyfer offer Deallusrwydd Artiffisial, ond yn y cyd-destun academaidd dylent gael eu defnyddio â gofal. Nid yw offer Deallusrwydd Artiffisial yn gallu cymryd lle dysgu neu feddwl yn feirniadol; gall eu defnyddio eich achosi i golli’r profiad o wirio ffeithiau a gwerthuso tystiolaeth, ynghyd â'r cyfle i ymarfer sgiliau ysgrifennu a chyfathrebu. Os byddwch yn cyflwyno gwaith i'w asesu a gynhyrchwyd gan offer deallusrwydd artiffisial heb ganiatâd penodol a heb ddatgan hyn, gallech wynebu ymchwiliad am gamymddygiad academaidd.
Bydd tiwtoriaid eich modiwlau a staff y Brifysgol yn rhoi arweiniad i chi ynghylch sut i ddefnyddio technolegau, gan gynnwys y manteision, y risgiau a'r ystyriaethau moesegol sydd ynghlwm wrth eu defnyddio. Dylech chi bob amser ofyn i'ch tiwtoriaid modiwl am wybodaeth ac eglurhad os nad ydych yn deall gofynion ac arweiniad ynghylch asesiad.
Am wybodaeth am ymagwedd y Brifysgol at ddefnyddio deallusrwydd artiffisial yn eich gwaith, ewch i'r tudalennau Canllawiau Deallusrwydd Artiffisial. Gallwch hefyd gofrestru ar gyfer cwrs Deallusrwydd Artiffisial a Sgiliau Academaidd y Ganolfan Llwyddiant Academaidd i feithrin dealltwriaeth ddyfnach o'r defnydd priodol o ddeallusrwydd artiffisial mewn Addysg Uwch.
Beth alla i ei wneud i gynnal Uniondeb Academaidd?
Y ffordd orau o gynnal uniondeb academaidd yw bod yn wybodus ynghylch polisïau a gweithdrefnau ar gyfer y Brifysgol, colegau unigol a modiwlau. Gweler y dolenni, y canllawiau a'r fideos isod am wybodaeth ac awgrymiadau llawn cymorth ynghylch sut i ddilyn eich astudiaethau ag uniondeb academaidd.
Darllen
Beth fydd yn digwydd os byddaf yn cyflawni Camymddwyn Academaidd?
Mae’r weithdrefn ar gyfer camymddygiad academaidd yn cael ei thrin fesul achos. Am ragor o wybodaeth, gweler y dolenni isod.
Ymhlith y cosbau posibl y mae rhybuddion ysgrifenedig, dileu marciau’r papur, marc sero ar gyfer y modiwl, dileu’r marciau ar gyfer lefel yr astudio, neu ddileu'r holl farciau a chael eich gwahardd o'r rhaglen.
