Creu nodiadau digidol

Gliniadur, llechen a ffôn clyfar, yr holl offer ar gyfer cymryd nodiadau digidol

Mewn gwirionedd, dylem sôn am ‘greu nodiadau’ neu ‘wneud nodiadau’ yn hytrach na ‘chymryd nodiadau’. Y rheswm am hyn yw bod nodiadau da’n waith unigryw sy’n cynrychioli eich meddyliau, eich dysgu, eich dealltwriaeth a’ch cwestiynu – sydd i gyd yn brosesau gweithredol. Ar y llaw arall, mae ‘cymryd’ nodiadau sy’n cynrychioli’r hyn rydych chi wedi’i glywed, gair am air, yn aneffeithiol ar gyfer dysgu. Maen nhw’n ffordd wych o gofnodi profiad (fel darlith) ond nodiadau gwael ydyn nhw ar gyfer dysgu gan eu bod yn cael eu datblygu’n oddefol a does dim angen i chi feddwl lawer.

Manteision gwneud nodiadau digidol

Os ydych yn defnyddio’r dull traddodiadol o ysgrifennu ar bapur i greu nodiadau, efallai yr hoffech ystyried y manteision pwerus sy’n deillio o ddefnyddio dyfeisiau digidol i greu nodiadau.

Recordio sain: Mae’r apiau mwy poblogaidd sy’n creu nodiadau’n caniatáu i ddefnyddwyr wrando ar eu nodiadau, sy’n offeryn gwych os yw’n well gennych ddysgu drwy wrando. Hefyd, gallwch recordio dyfyniadau o’ch darlithoedd, neu ddarlith gyfan hyd yn oed, fel ffynhonnell wrth gefn ar ben eich nodiadau. Gyda rhai, gallwch hyd yn oed gydamseru eich nodiadau â’r recordiad sain – felly gallwch wrando ar rannau o’r ddarlith eto wrth adolygu eich nodiadau.

Symleiddio rhannu: Os ydych yn cymryd rhan mewn gwaith grŵp, mae creu nodiadau digidol yn symleiddio’r broses rannu ac mae’n golygu na allwch golli deunydd a rannwyd. Gallwch rannu nodiadau drwy glicio botwm ac, ar yr amod eich bod wedi’u cadw neu greu copi wrth gefn, mae’n eithaf anodd eu colli.

Gallu i chwilio: Rheswm amlwg dros wneud nodiadau yw eich bod yn gallu dychwelyd atynt a’u hadolygu nes ymlaen. Ond gall fod yn rhwystredig chwilio drwy dudalennau o nodiadau i ddod o hyd i un darn o wybodaeth. Mae llawer o apiau gwneud nodiadau’n eich galluogi i chwilio am eiriau ac ymadroddion allweddol i ddod o hyd i wybodaeth yn gyflym. Mae rhai apiau’n caniatáu i chi chwilio drwy eich llawysgrif hyd yn oed.

Apiau creu nodiadau

OneNote

Mae Microsoft OneNote yn casglu nodiadau (wedi’u hysgrifennu neu eu teipio), lluniau, sgrinluniau a sylwebaethau sain defnyddwyr. Gellir rhannu nodiadau â defnyddwyr eraill drwy’r rhyngrwyd neu rwydwaith. Mae OneNote ar gael fel rhan o becyn Microsoft Office. Mae hefyd ar gael fel cymhwysiad unigol am ddim ar gyfer Windows, Mac, Ffôn Windows, iOS ac Android. Darperir fersiwn we o OneNote fel rhan o OneDrive neu Office Online ac mae’n galluogi defnyddwyr i olygu nodiadau drwy borwr gwe.

Mae OneNote ar gael am ddim i holl fyfyrwyr Prifysgol Abertawe drwy Office 365.

Glean

Mae Glean yn caniatáu ichi recordio'ch darlithoedd a'ch cyfarfodydd, gan gysylltu sleidiau â'r sain berthnasol sydd wedi'i dal, gan dynnu sylw at wybodaeth allweddol gydag anodiadau ysgrifenedig byr a'u hanodi. Bydd hyn yn caniatáu ichi gadw ffocws a chymryd rhan weithredol yn y sesiwn, gyda'r tawelwch meddwl y gallwch chi ddychwelyd yn hawdd i'r rhannau pwysig ar ôl y sesiwn pan fyddwch chi'n ail-ymweld â'ch nodiadau.

Mindview

Dyma ffordd arall o wneud nodiadau, drwy greu map meddwl. Gallwch greu darlun gweledol o’ch syniadau, gan ganiatáu i chi gysylltu cysyniadau allweddol a dangos perthnasoedd a hierarchaethau yn eich syniadau. Gallwch gyrchu treial am ddim 30 diwrnod trwy wefan Mindview.

Mae’r cynnwys hwn yn dod o’r ffynhonnell ganlynol gan Brifysgol Hull, ac mae wedi’i drwyddedu dan Drwydded Ryngwladol Creative Commons Attribution-NonCommercial-ShareAlike 4.0.