Canllawiau Defnyddio FyMhresenoldeb

Dyma’r porwyr gorau i weld system MyEngagement:

• Google Chrome
• Microsoft Edge
• Apple Safari
• Mozilla Firefox

Mae eich categori ymgysylltu yn cael ei bennu yn unol â mathau gwahanol o ryngweithio digidol sydd gennych chi â systemau’r Brifysgol. Bydd y categori yn seiliedig ar ba mor aml y byddwch chi’n gwneud y canlynol:

• Mewngofnodi i Canvas
• Clicio i weld cynnwys y cyrsiau yn Canvas
• Sweipio eich cerdyn mewn sesiwn ddysgu wyneb yn wyneb
• Cyrchu sesiwn ddysgu ar-lein drwy dudalennau modiwlau Canvas (Zoom)
• Gweld sesiwn ddysgu wedi’i recordio drwy dudalennau modiwlau Canvas (Panopto)
• Mynediad at e-adnoddau’r llyfrgell (Open Athens) 

Bob tro y byddwch chi’n cyrchu un o’r adnoddau hyn (megis mewngofnodi i Canvas neu gyrchu darlith ar-lein yn fyw), bydd FyMhresenoldeb yn rhoi nifer o bwyntiau ichi. Mae rhai mathau o ryngweithio’n werth mwy o bwyntiau na rhai eraill gan ein bod yn eu hystyried yn fwy ystyrlon o ran tracio eich ymgysylltu. Er enghraifft, nid yw’r pwyntiau a roddir am fewngofnodi i Canvas mor uchel â’r pwyntiau ar gyfer cyrchu deunyddiau eich cyrsiau yn Canvas. Rydym wedi cymryd y safbwynt hwn oherwydd ei bod yn fwy gwerthfawr o ran eich dysgu i weld deunyddiau cwrs na dim ond mewngofnodi i system. Mae FyMhresenoldeb yn defnyddio’r broses wedi’i phwysoli hon i chwilio am y mathau o ryngweithio a wnewch ar y system ac i fesur eich categori ymgysylltu. Hwyrach bydd oedi o 24 awr cyn i’ch categori gael ei ddiweddaru tra bod y system yn prosesu’r data.

At ddibenion y broses monitro cyfranogiad, sylwer y caiff eich cyfranogiad ei fonitro ar sail sweipio eich cerdyn mewn sesiynau dysgu wyneb yn wyneb, ynghyd â chyrchu deunyddiau eich cwrs yn Canvas. Ar gyfer y Llwybr Myfyrwyr (myfyrwyr Haen 4 yn flaenorol), mae'n seiliedig ar ddata sweipio cardiau yn unig o ganlyniad i ofynion y Swyddfa Gartref (UKVI). Darperir setiau data ychwanegol i chi yn system MyEngagement i roi darlun cyflawn i chi o'ch cyfranogiad ar draws systemau'r Brifysgol.

Dylai myfyrwyr sweipio eu cerdyn myfyriwr wrth fynychu pob sesiwn ddysgu wyneb yn wyneb ar y campws yn unol â'u hamserlen. Mae data sweipio cerdyn lefel uchel ar gael yn yr adran Adnoddau er gwybodaeth i chi.

Ar ôl ichi fewngofnodi, byddwch yn cael eich cludo i’ch cofnod myfyriwr lle bydd y tab Ymgysylltu yn ymddangos. Mae’r tab yn dangos crynodeb o’ch data ymgysylltu a bydd yn dangos y 4 wythnos diwethaf heb ichi wneud dim.

Ar frig y dudalen mae pennyn sy’n cynnwys gwybodaeth megis eich enw a’ch cwrs. Ceir nifer o ddangosyddion hefyd sy’n caniatáu ichi weld gwybodaeth allweddol mewn amrantiad.

Mae’r dangosydd ar ffurf swigen ‘Ymgysylltu’ yn dangos eich categori ymgysylltu yn ystod y 24 awr ddiwethaf (cofiwch y gallai fod oedi o hyd at 24 awr i hyn gael ei ddiweddaru tra bod y system yn prosesu’r data):

Mae’r dangosydd ar ffurf swigen ‘Cyfartaledd’ yn dangos eich categori ymgysylltu yn ystod y 30 diwrnod diwethaf:

Y categorïau ymgysylltu yw:

Mae sgoriau ymgysylltu sy'n rhan o'r categorïau Rhannol (P), Da (G) ac Uchel (H) yn adlewyrchu ymgysylltu â'ch cwrs ar lefelau arferol a chyson.

Mae sgoriau ymgysylltu sy'n rhan o'r categorïau Isel (L), Isel Iawn (V) a Dim (N) yn adlewyrchu ymgysylltu anghyson a gallai olygu y bydd eich Cyfadran/Ysgol neu Wasanaethau Cydymffurfio Myfyrwyr yn cysylltu â chi i drafod eich lefelau ymgysylltu yn unol â'r Polisi Monitro Ymgysylltu er mwyn sicrhau eich lles a chynnig cymorth.

Mae’r dangosydd ar ffurf swigen ‘Tuedd’ yn dangos i ba gyfeiriad y mae eich categori ymgysylltu yn mynd. Mae saeth lorweddol yn golygu bod y categori ymgysylltu yn gyson ac, yn yr achos hwn, mae’n esgyn: 

Yn gyffredinol, bydd yn cymryd tua wythnos i symud i lawr neu i fyny pob un o’r categorïau ymgysylltu ond os nad ydych chi’n defnyddio un o’r adnoddau o gwbl am nifer o ddyddiau, yna hwyrach bydd eich categori ymgysylltu yn cwympo’n gyflymach.

Trosolwg rhyngweithiol o’ch ymwneud â systemau’r Brifysgol yw’r graff ymgysylltu. Mae’n diweddaru ei hun i adlewyrchu ystod y dyddiadau a ddewisir ar frig y dudalen ar y chwith. Mae modd newid y graff fesul ymgysylltu dyddiol neu gyffredinol drwy glicio ar y botymau uwchben y graff:

Gallwch chi ddefnyddio’r graff i ddewis opsiynau gwahanol fel a ganlyn:

1. Dewis ystod y dyddiadau a ddangosir ar y graff rhwng dau ddyddiad ar frig y dudalen ar y chwith
2. Dewis y cyfnodau o amser (Yr wythnos diwethaf, y 4 wythnos diwethaf a’r 10 wythnos diwethaf)
3. Dewis a dad-ddewis:
a) Digwyddiadau rhyngweithio (h.y. cyfarfodydd rydych wedi’u cael gyda’ch Tîm Profiadau’r Myfyriwr yn eich Cyfadran/Ysgol neu gyda Gwasanaethau Cydymffurfio’r Myfyrwyr o ran y math o ymgysylltu rydych yn ei wneud)
b) Digwyddiadau drwy Rybudd (h.y. os ydych chi wedi gosod rhybudd ar gyfer ymgysylltu isel parhaus fel a nodir yn y Polisi Monitro Ymgysylltu)
c) Digwyddiadau newid cwrs
ch) Llinell ymgysylltu’r garfan ar gyfartaledd
d) Y llinell ymgysylltu yn yr 25% uchaf

dd) Digwyddiadau eithrio (h.y. os oeddech chi wedi gofyn am seibiant dros dro o’ch astudiaethau yr oedd eich Cyfadran/Ysgol wedi’i gymeradwyo) 

Ar waelod y Tab Ymgysylltu ar y dde mae calendr treiglol sy’n dangos pob un o’r categorïau ymgysylltu dros gyfnod o fis. Wrth y calendr, byddwch chi’n gweld y siart bar ‘Engagement Breakdown’. Amcan y bar yw dangos ichi ar sail ganrannol faint o amser rydych chi wedi’i dreulio ym mhob categori ymgysylltu ac mae’r data yn cael ei gyfyngu yn unol ag ystod y dyddiadau rydych chi’n ei ddewis ar frig y dudalen:

Crynodeb o’ch gwybodaeth bersonol wedi’i drefnu fesul cyfres o gardiau yw Tab Proffil y Myfyriwr.

Rhestr o’ch rhyngweithiadau yn y gorffennol yw’r Tab Rhyngweithiadau, gan gynnwys:

• Rhybuddion (os ydych chi wedi gosod rhybudd ar gyfer ymgysylltu isel parhaus fel a nodir yn y Polisi Monitro Ymgysylltu)
• Eithriadau (os bydd eich Coleg neu Ysgol wedi cymeradwyo eich cais am seibiant dros dro o’ch astudiaethau)
• Rhyngweithiadau (os ydych chi wedi cael cyfarfod gyda’ch Tîm Profiadau’r Myfyriwr yn eich Coleg neu Ysgol neu gyda Gwasanaethau Cydymffurfio’r Myfyrwyr o ran y math o ymgysylltu rydych yn ei wneud)

Anfonir hysbysiadau at fyfyrwyr os nad ydynt wedi cyrchu deunyddiau eu cwrs yn Canvas na chyfranogi wyneb yn wyneb am gyfnodau parhaus o bythefnos, neu sydd â chyfranogiad isel yn y meysydd hyn, yn unol â'r Polisi Monitro Cyfranogiad. Yn achos myfyrwyr sydd ar y Llwybr Myfyrwyr (Haen 4 yn flaenorol), anfonir hysbysiadau at fyfyrwyr sydd heb fynd i sesiynau dysgu wyneb yn wyneb ar sail wythnosol. Efallai bydd eich Cyfadran/Ysgol yn gosod hysbysiadau i olrhain diffyg cyfranogiad parhaus dros amser hefyd fel y gellir darparu cymorth ac arweiniad yn ôl yr angen, a bydd y rhain hefyd yn dangos yn eich adran Rhyngweithiadau os byddant wedi cael eu sbarduno.

Rhestrir yr eitemau fesul trefn dyddiad a bydd dangosydd statws yn perthyn iddyn nhw.

Bydd clicio ar eitem unigol yn ehangu’r cofnod fel y gallwch ei weld yn fanylach:

Nid yw’r data am ganrannau mynychu mewn sesiynau dysgu wyneb yn wyneb ar gael ar hyn o bryd yn system MyEngagement ond bydd angen i chi sweipio eich cerdyn wrth fynd i sesiynau addysgu wyneb yn wyneb ac mae data sweipio cerdyn lefel uchel ar gael yn yr adran Adnoddau i chi edrych arno er gwybodaeth i chi.

Mae’r tab Adnoddau’n dangos amrywiaeth o ffynonellau data sy’n cynrychioli cyfranogiad mewn dysgu ac addysgu. Y setiau data a welwch chi’r yw’r rhai canlynol:

Mewngofnodiadau i Canvas
Mynediad i Fodiwlau Canvas
Recordiadau Darlithoedd (Panopto)
Sesiynau Byw ac Ar-lein o Ddarlithoedd/Seminarau (Zoom)
E-adnoddau’r Llyfrgell
Defnydd o’r Cerdyn Sweipio

Nid yw data sweipio cerdyn yn cael eu defnyddio i gyfrifo eich cyfranogiad yn y system ar hyn o bryd ond caiff cyfranogiad ei fonitro'n bennaf drwy fynychu sesiynau dysgu wyneb yn wyneb. Dylai myfyrwyr sy’n mynychu sesiynau wyneb yn wyneb sweipio eu cardiau wrth fynd i mewn i’r sesiynau addysgu wyneb yn wyneb yn unol â’u hamserlen.  

Mae’r setiau data gwahanol yn cael eu pwysoli’n wahanol ac maen nhw’n cyfrannu’n wahanol i’r categori ymgysylltu. Gallwch chi newid cyfnod y dyddiadau ar frig y dudalen ar y chwith i weld faint rydych chi’n defnyddio pob un o’r eitemau yn ystod cyfnod o ddyddiadau rydych chi’n ei ddewis.

Os ydych chi eisiau rhagor o wybodaeth, dangosir isod siart gylch a thabl crynodeb o weithgareddau tua gwaelod y sgrîn:

Nid yw’r data asesiadau ar gael ar hyn o bryd yn system MyEngagement. Ewch i’ch cyfrif Mewnrwyd i weld y data asesu.

Drwy glicio ar eicon dewislen dewisiadau’r defnyddiwr ar frig y dudalen ar y dde bydd cwymplen yn caniatáu ichi gyflunio MyEngagement i weddu i’ch anghenion chi. Mae’r ddewislen yn cynnwys:

· Iaith – Gallwch ddewis newid yr iaith i’r Saesneg
· Thema Dywyll – mae’n dewis y thema dywyll
· Allgofnodi – mae’n gadael y cymhwysiad

Bydd clicio ar y botwm Cymorth ar ochr dde’r sgrîn yn dangos dolenni URL i gael rhagor o gefnogaeth yn y Brifysgol:

Yn y pennyn ar frig y dudalen mae tab ar gyfer cwestiynau a ofynnir yn aml:

Drwy glicio ar y tab bydd rhestr o gwestiynau a ofynnir yn aml yn ymddangos ar y cyd â’r wybodaeth ar y dudalen yma a’n tudalennau Monitro Ymgysylltu.