Datganiad Canlyniadau Graddau Prifysgol Abertawe 2023-24

Dangosir proffil dosbarthiadau graddau Prifysgol Abertawe ar gyfer y blynyddoedd academaidd 2015/16 i 2022-23 yn y tabl isod:

Canlyniadau Graddau

Mae'r data'n dangos bod proffil cyfunedig graddau Anrhydedd Dosbarth Cyntaf ac Anrhydedd Ail Ddosbarth Uwch y Brifysgol wedi cynyddu o'i gymharu â'r flwyddyn 2021/22 i 83.1% (+3%). Fodd bynnag, mae'r cynnydd yn sgîl cynnydd yn nifer y graddau Anrhydedd Dosbarth Cyntaf (+4%), ond mae nifer y graddau Anrhydedd Ail Ddosbarth Uwch wedi gostwng i 45.5% (-1%). Cafwyd gostyngiad bach yn nifer y dosbarthiadau 2:2 i 15.6% (-0.2%).

Er na fydd data meincnodi ar gael tan fis Ionawr 2024, mae’r blynyddoedd diweddar wedi dangos patrwm tebyg i gyfartaledd y sector, gyda chynnydd bach yn 2021/22.

Mae'r Brifysgol wedi parhau i gynnal safonau a gwella ansawdd rhaglenni'r Brifysgol, i sicrhau bod gan fyfyrwyr y gobaith gorau o raddio gyda graddau Anrhydedd Dosbarth Cyntaf neu Anrhydedd Ail Ddosbarth Uwch ac i'w helpu i sicrhau cyflogaeth raddedig. 

Gellir priodoli'r cynnydd ym mhroffil y canlyniadau graddau, yn enwedig y canlyniadau Dosbarth Cyntaf ac Ail Ddosbarth Uwch, i amrywiaeth o ffactorau sy'n canolbwyntio ar wella ansawdd, safonau a phrofiad y myfyrwyr:

• Mae gwelliannau parhaus i addysgeg dysgu ac addysgu, asesu, profiad y myfyrwyr a chymorth i fyfyrwyr, gan gynnwys tiwtora personol, wedi effeithio'n gadarnhaol ar berfformiad a chanlyniadau myfyrwyr.
• Drwy ganolbwyntio ar wneud gwelliannau mewn meysydd pwnc gwannach, cynyddwyd cysondeb ar draws y portffolio. Mae'r Brifysgol yn adolygu perfformiad modiwlau a rhaglenni'n gyson ar draws amrywiaeth o fetrigau ac mae hyn yn cynnwys ehangder canlyniadau gradd ar draws yr amrediad a ddyfernir.
• Gwelliannau ymhlith myfyrwyr sydd â chymwysterau mynediad ar wahân i Safon Uwch/Uwch Gyfrannol, yn benodol Cyrsiau Mynediad.

Ar gyfer yr holl raglenni, caiff deilliannau dysgu ac asesu eu mapio'n glir yn erbyn Côd Ansawdd yr Asiantaeth Sicrhau Ansawdd, maent yn bodloni gofynion cyrff proffesiynol, statudol a rheoleiddiol (PSRB), yn ystyried datganiadau Meincnodi Pwnc yr Asiantaeth Sicrhau Ansawdd ac yn cyd-weddu â'r Fframwaith Cymwysterau Addysg Uwch a Fframwaith Credydau a Chymwysterau Cymru. Mae hyn yn sicrhau bod safonau graddau'n cael eu cynnal a bod arbenigwyr allanol (cynrychiolwyr PSRB, defnyddwyr gwasanaethau, myfyrwyr, cyflogwyr, rhanddeiliaid) yn llywio ac yn sicrhau ansawdd ein rhaglenni.

Mae Polisi Asesu, Marcio ac Adborth y Brifysgol (diweddarwyd 2023) yn darparu egwyddorion asesu a gofynion ac mae'n ysgogi gwelliannau mewn arferion asesu. Mae'r polisi yn cynnwys gofynion ar gyfer marcio a dylunio asesiadau yn ogystal â dolenni at reoliadau'r Brifysgol ar gyfer Asesu a Dyfarnu. Goruchwylir y broses o ddylunio asesiadau a marcio gan Arholwyr Allanol arbenigol, sy'n adolygu ac yn cymeradwyo dyluniad asesiadau i sicrhau cysondeb a dilysrwydd; maent hefyd yn darparu adroddiad blynyddol ar brosesau asesu ac yn mynd i gyfarfodydd y Byrddau Arholi perthnasol.

Mae diwygiadau diweddar i'r polisi wedi ystyried newidiadau i derminoleg a ddefnyddir ar draws y sector yn yr Arolwg Cenedlaethol o Fyfyrwyr, cosbau asesu, amserlenni marcio a chymedroli, gofynion cymedroli a gofynion cyfrwng Cymraeg.

Ategir y gwaith o weithredu'r polisi gan Gôd Ymarfer Dysgu, Addysgu ac Asesu helaeth yn ogystal â chan Academi Dysgu ac Addysgu Abertawe ac  Academi Cynwysoldeb Abertawe.

Ar ben hynny, gofynnir i'r holl staff academaidd sy'n newydd i AU gwblhau’r Dystysgrif Addysgu Ôl-raddedig Addysg Uwch, a fydd yn cyflwyno Côd Ansawdd yr Asiantaeth Sicrhau Ansawdd iddynt yn ogystal â phob agwedd ar ddylunio rhaglenni ac asesiadau a phrosesau sicrhau ansawdd. Darperir rhagor o weithdai sy'n cynnwys pob agwedd ar asesu a marcio gan Academi Dysgu ac Addysgu Abertawe.

Uniondeb Academaidd

Mae'r Brifysgol wedi cynnal rhaglen o weithgarwch gwella fel rhan o brosiect Ymlaen drwy gydol 2022/23 a bydd hon yn parhau i 2023/24.  Nododd y gwaith yn 2022/23 fod Uniondeb Academaidd yn faes i’w wella a sefydlwyd gweithgorau dynodedig ar gyfer y 4 thema ganlynol: 

• Cyfarwyddo Staff
• Polisi a Rheoliadau
• Sgiliau Uniondeb Academaidd Myfyrwyr
• Gweithdrefnau, Cysondeb a Systemau

Roedd rhaglen Ymlaen yn hwyluso cyfranogiad myfyrwyr yn y gwaith ar Uniondeb Academaidd ynghyd ag ymgynghori â staff ar draws y sefydliad.  Canlyniad allweddol o'r gwaith yw cyflwyniad system newydd sydd wedi arwain at gysoni’r polisi Amgylchiadau Esgusodol ar draws pob un o'r tair Cyfadran, gan sicrhau bod profiad y myfyrwyr yn gyson, gan gynnwys amserlenni a phrosesau ar gyfer amgylchiadau esgusodol. 

Mae llywodraethu academaidd yn hanfodol i ddiogelu gwerth cymwysterau a ddyfernir gan y Brifysgol. Mae Pwyllgor Addysg y Brifysgol yn gyfrifol am oruchwylio Ansawdd a Safonau ac mae'n darparu adroddiad blynyddol i Gyngor (Llywodraethwyr) y Brifysgol, sy'n eu sicrhau bod ansawdd a safonau'n cael eu cynnal. Cynhaliwyd Adolygiad Gwella Ansawdd yr Asiantaeth Sicrhau Ansawdd ym mis Tachwedd 2020, gan fodloni gofynion Fframwaith Asesu Ansawdd Cymru. 

Ar y cyd â'r adolygiad hwn, gofynnir i'r llywodraethwyr gadarnhau nifer o ddatganiadau'n flynyddol fel rhan o Fframwaith Asesu Ansawdd Cymru CCAUC, gan gynnwys, yn achos darparwyr sydd â'r gallu i ddyfarnu graddau, nodi bod safonau'r dyfarniadau y maent yn gyfrifol amdanynt wedi cael eu pennu a'u cynnal yn briodol. 

I gynorthwyo'r llywodraethwyr wrth roi’r sicrwydd hwnnw, mae mecanwaith adrodd sy'n trosglwyddo gwybodaeth drwy'r sefydliad, drwy Bwyllgorau a Byrddau Sicrhau Ansawdd Cyfadrannau ac Ysgolion a'r Sefydliad i Bwyllgor Addysg y Brifysgol. Ceir hefyd Fwrdd Partneriaethau Cydweithredol, sy'n goruchwylio’r holl drefniadau partneriaeth. Gyda'i gilydd, mae'r strwythur llywodraethu hwn yn sicrhau bod cyrff lleol wedi'u grymuso ond bod gan y Brifysgol drosolwg clir o ansawdd a safonau. Diweddarwyd yr holl Bwyllgorau a Byrddau Sicrhau Ansawdd yn sgîl ailstrwythuro'r sefydliad yn haf 2021 i greu cyfadrannau ac ysgolion, ac i sicrhau bod eu hymagwedd yn ymatebol ac yn effeithiol. 

Mae proses Adolygu Ansawdd fewnol y Brifysgol yn cynnwys Adolygiad Blynyddol o Fodiwlau, Adolygiad Blynyddol o Raglenni ac Adolygiadau Ansawdd sydd wedi'u dylunio i adolygu'n fanwl feysydd y mae angen eu cefnogi, heb leihau craffu mewn meysydd perfformiad uchel. Gyda'i gilydd, mae'r ymagweddau hyn yn sicrhau bod gan y Brifysgol drosolwg clir a deialog rheolaidd ynghylch ansawdd a safonau ei darpariaeth, sydd wrth wraidd canlyniadau graddau. 

Mae'r Arholwyr Allanol a'r Arbenigwyr Pwnc Allanol yn hollbwysig i ddylunio, cymeradwyo ac adolygu rhaglenni'n barhaus ac maent yn cyfrannu at yr holl weithgareddau i ddylunio neu adolygu rhaglenni.  Ar lefel y sefydliad, mae'r Bwrdd Dilyniant a Dyfarniadau'n derbyn adroddiad gan yr Arholwr Allanol ar lefel  Cyfadran/Ysgol ac mae'n darparu adroddiad sefydliadol i Bwyllgor Addysg y Brifysgol. Gofynnir i Gyfadrannau/Ysgolion roi ymateb ar lefel leol ac mae'r Brifysgol yn ymateb i gamau gweithredu a gymerir yn sgîl adroddiadau gan Arholwyr Allanol ac yn eu goruchwylio ar lefel y sefydliad.

Yn 2022/23, cyflwynwyd proses newydd ar gyfer adrodd am Adroddiadau Sicrhau Ansawdd ar lefel Cyfadran i groesgyfeirio tair ffynhonnell o ddata o Adroddiadau Arholwyr Allanol, yr Adolygiad Blynyddol o Raglenni ac Adborth Myfyrwyr.  Mae'r adroddiad hwn yn sicrhau bod lleisiau a phrofiadau staff, myfyrwyr ac arholwyr allanol yn cael eu cyfuno ac mae’n helpu i nodi patrymau a thueddiadau, o ran arfer da a meysydd i’w gwella.  Derbynnir yr adroddiadau gan y Pwyllgor Rheoliadau, Ansawdd a Safonau ar y cyd â'r holl reoliadau a adolygir yn flynyddol i sicrhau eu bod yn gyfredol ac yn addas at y diben o hyd.

Cyhoeddir rheoliadau dosbarthu Prifysgol Abertawe fel rhan o'i Rheoliadau Academaidd. Adolygir y rheoliadau hyn o hyd.

Fel arfer, caiff dosbarth gradd yr ymgeisydd ei bennu'n unol â'r marc cyfartalog wedi'i bwysoli ar gyfer yr holl fodiwlau, gan gynnwys marciau'r methiannau a ddigolledir, gan gyfrannu at yr asesiad o’r anrhydedd gan ddefnyddio'r ffiniau dosbarthiad canlynol:

Band 3: Y marciau gorau a gyflawnwyd mewn 80 o gredydau ar lefel 6, gan roi pwysoliad o 3
Band 2: Marciau lefel 6 o'r 40 o gredydau sy'n weddill a'r marciau gorau a gyflawnwyd mewn 40 o gredydau ar lefel 5, gan roi pwysoliad o 2
Band 1: Marciau a gyflawnwyd yn y credydau ar lefel 5 sy'n weddill, gan roi pwysoliad o 1

Yna defnyddir fformiwla i gyfrifo dosbarthiad y radd ar gyfartaledd.

Cyfle: Gall myfyrwyr sydd o fewn 2% i ffin dosbarthiad gael eu hystyried am gael eu dyrchafu i'r dosbarthiad nesaf os ydynt yn bodloni'r meini prawf canlynol.

Yr Egwyddor Mwyafrif: Er mwyn dyfarnu’r dosbarthiad uwch i fyfyriwr, rhaid bod y myfyriwr wedi cyflawni marciau ym mand y dosbarthiad uwch mewn modiwlau sydd â phwysoliad credydau gwerth o leiaf hanner y rheiny sy'n cyfrannu at ddosbarthiad y radd.

Cyfradd Welliant Wrth Ymadael (Exit Velocity): Bydd Bwrdd Dilyniant a Dyfarniadau'r Brifysgol yn ystyried cyfartaledd y flwyddyn astudio olaf heb bwysoliad. Pan fydd cyfartaledd blwyddyn olaf myfyriwr ym mand y dosbarthiad uwch, bydd Bwrdd Dilyniant a Dyfarniadau’r Brifysgol yn dyfarnu gradd yn y dosbarth uwch fel arfer.

Mae'r Brifysgol yn ymgymryd â rhaglen wella o'r enw Ymlaen.  Mae'n canolbwyntio ar gyflawni newid sylweddol o ran effeithiolrwydd y sefydliad dros y tair blynedd nesaf yn ogystal ag ymgorffori diwylliant o wella’n barhaus a fydd yn parhau i'r dyfodol.  Mae gan raglen Ymlaen gwmpas eang â thri phrif gategori:

1. Prif brosiectau
2. Gwella’n Barhaus/Prosesau
3. Gwelliannau Cyflym

Yn 2022/23, canolbwyntiodd y rhaglen ar y 4 maes allweddol canlynol:

• Amgylchiadau Esgusodol
• Uniondeb Academaidd
• Mentora Academaidd
• Ymgysylltu a Chyfathrebu â Myfyrwyr

Ar gyfer 2023/24, bydd y rhaglen yn ymgorffori gwaith y pedwar maes y sonnir amdanynt uchod ac yn canolbwyntio ar gam nesaf y rhaglen gan gynnwys gwella cyfathrebu â myfyrwyr, porth i wasanaethau myfyrwyr a systemau a phrosesau i gefnogi staff a myfyrwyr.

Yn dilyn gwaith sylweddol i ailstrwythuro'r Brifysgol o golegau i strwythur sy'n seiliedig ar gyfadrannau ac ysgolion yn haf 2021, mae rhagor o feysydd wedi cael eu hadolygu a'u hailstrwythuro bellach er mwyn iddynt gydweddu ag arferion gwaith, prosesau a systemau newydd.  Mae hyn wedi arwain at ailenwi’r Gwasanaethau Academaidd yn Wasanaethau Addysg, ac mae Academi Dysgu ac Addysgu Abertawe ac Academi Cynwysoldeb Abertawe bellach wedi'u cynnwys yn y Gyfarwyddiaeth Gwasanaethau Addysg.  Mae’r tîm Gwasanaethau Myfyrwyr hefyd wedi cael ei ailenwi'n dîm Bywyd Myfyrwyr ac mae hwn yn cynnwys MyUniHub a Gwasanaethau Partneriaethau ac Ymgysylltu â Myfyrwyr.   

Mae data am ganlyniadau graddau yn un o'r setiau allweddol o ddata sy'n cael eu hadolygu gan raglenni fel rhan o'r Adolygiad Blynyddol o Fodiwlau a Rhaglenni, sy'n barhaus, ac Adolygiadau Ansawdd manylach. Nodir arfer effeithiol drwy'r prosesau ansawdd hyn, ac fe'i hamlygir yn Adroddiadau Trosolwg Ansawdd y Cyfadrannau fel yr amlinellwyd yn flaenorol, ynghyd â thrwy  dudalennau gwe Academi Dysgu ac Addysgu Abertawe.

Ar y cyd â'n monitro rheolaidd, mae'r Brifysgol wedi bod yn canolbwyntio ar wella profiad y myfyrwyr yn barhaus, gan ymdrechu'n benodol i wella'r meysydd canlynol sy'n effeithio'n uniongyrchol ar berfformiad myfyrwyr:

Addysgeg Dysgu ac Addysgu

Mae'r Brifysgol yn cefnogi ac yn galluogi gwella dysgu ac addysgu'n barhaus, gan gyflawni arloesi a gwella'n barhaus ar draws yr holl Gyfadrannau/Ysgolion. Ar y cyd â chefnogaeth gan Academi Dysgu ac Addysgu Abertawe, mae Arweinwyr Addysg Cyfadrannau/Ysgolion yn cwrdd yn rheolaidd ac yn canolbwyntio ar wella ymagweddau yn eu meysydd. Mae'r Brifysgol yn cydnabod ac yn gwobrwyo dysgu ac addysgu drwy lwybrau gyrfa penodol a chymryd rhan ym mhroses y Gymrodoriaeth AU.

Mae hyn wedi arwain at broses cynllunio gweithredu ac adrodd newydd i gefnogi gwella, prosesau symlach i alluogi'n gweithgarwch dysgu ac addysgu i fod yn hyblyg ac yn ymatebol ac ymyriadau penodol i gefnogi meysydd penodol ar draws y sefydliad. 

Asesu, Marcio ac Adborth

Mae'r Brifysgol wedi bod yn canolbwyntio ar wella Asesu ac Adborth ers peth amser ac mae wedi diweddaru'r polisi Asesu, Marcio ac Adborth yn ddiweddar i fynd i'r afael â'r gwelliannau hyn. 

Bydd y Brifysgol yn canolbwyntio ar wella asesu yn 23/24, gan roi pwyslais penodol ar ymgorffori deallusrwydd artiffisial ac arweiniad i gefnogi staff a myfyrwyr wrth ddefnyddio offer o'r fath ac i sicrhau bod uniondeb dyfarniadau'n cael ei gynnal drwy arferion asesu effeithiol, dilys a diogel.