Israddedig: Tynnu'n ôl / Gohirio

GOHIRIO - Mae gohirio’ch astudiaethau’n golygu cymryd saib neu atal eich astudiaethau dros dro, fel arfer am resymau personol. Fel rheol, mae myfyrwyr yn gwneud hyn gan fwriadu ailafael yn y cwrs yn ddiweddarach (fel arfer yn y flwyddyn academaidd nesaf).  Pan fyddwch yn gohirio'ch astudiaethau fel arfer, ystyrir bod eich cyllid myfyriwr 'wedi'i atal' am weddill y flwyddyn academaidd, ond gall hyn gael effaith fawr ar y cyllid y bydd gennych hawl iddo yn y dyfodol.

TYNNU'N ÔL- Mae hyn yn golygu terfynu'ch cofrestriad ar eich rhaglen astudio a phob uned gysylltiedig yn gyfan gwbl. Caiff eich cyllid myfyriwr ei atal am weddill y flwyddyn ac, os penderfynwch ddychwelyd yn y dyfodol, caiff unrhyw flynyddoedd rydych wedi'u cwblhau eu hystyried yn flynyddoedd blaenorol.

Eich cam cyntaf yw siarad â'ch Tiwtor neu'ch Coleg am eich sefyllfa. Bydd hyn yn rhoi cyfle i chi drafod eich sefyllfa a cheisio arweiniad ynghylch pa ddewis yw’r gorau, a gallwch gael cymorth ychwanegol os bydd ei angen.

Pan fyddwch wedi gwneud eich penderfyniad, bydd angen i chi gymryd rhan mewn ymgynghoriad Newid Statws Cofrestru yn Hyb y Myfyrwyr.  Yn ystod yr ymgynghoriad, byddwch yn trafod y dewisiadau sydd ar gael i chi a’r goblygiadau a all ddeillio o newid eich statws.

Mae gan bob myfyriwr cymwys hawl i gyllid ffioedd dysgu a chyllid cynhaliaeth am hyd ei gwrs, +1 flwyddyn ychwanegol. Gallwch ddefnyddio’r flwyddyn ychwanegol o gyllid os ydych yn gohirio ran o’r ffordd drwy’r flwyddyn academaidd neu os oes rhaid i chi ail-wneud blwyddyn o’ch cwrs.

Er enghraifft: Cwrs 3 blynedd + 1 flwyddyn ychwanegol = 4 blynedd o gyllid

Mae nifer y blynyddoedd a gaiff eu hystyried gan ddarparwr eich cyllid yn seiliedig ar eich cyfnod yn gofrestredig yn y Brifysgol, yn hytrach nag a ydych wedi cwblhau blwyddyn lawn o astudio neu wedi derbyn cyllid myfyriwr. Hynny yw, bydd cofrestru am ychydig wythnosau gyfwerth â blwyddyn lawn o astudio blaenorol.

Fel arfer, ni fydd blynyddoedd o astudio blaenorol yn effeithio ar fenthyciadau cynhaliaeth.

Os nad oes gennych hawl i gyllid digonol ar gyfer hyd llawn eich cwrs, disgwylir i chi dalu eich ffioedd dysgu eich hun*. (Bydd hyn yn berthnasol ym mlynyddoedd cynnar eich cwrs, oherwydd y bydd eich hawl i gyllid yn weithredol ar gyfer blwyddyn olaf eich cwrs newydd, gan weithio'n ôl o hynny).

*Hyd yn oed os ydych yn fyfyriwr sy'n byw yng Nghymru ac yn derbyn Grant Ffioedd Dysgu, byddai rhaid i chi dalu swm llawn y Ffioedd Dysgu eich hun, oherwydd bod blynyddoedd blaenorol o astudio'n effeithio ar Fenthyciadau Ffioedd Dysgu a Grantiau fel ei gilydd.

*Caiff myfyrwyr o'r UE wneud cais am flynyddoedd ychwanegol o gyllid hefyd, yn seiliedig ar resymau personol anorchfygol os yw hynny'n berthnasol.

Os ydych yn gohirio'ch astudiaethau neu'n tynnu'n ôl o'ch cwrs, bydd yn ofynnol i'r Brifysgol roi gwybod i'r Cwmni Benthyciadau Myfyrwyr o'ch dyddiad ymgysylltu olaf (mewn darlithoedd, seminarau neu arholiadau). Gan ddibynnu ar bryd rydych yn cwblhau'r dogfennau perthnasol, gall y dyddiad hwn wneud gwahaniaeth mawr i'r ffioedd dysgu a godir arnoch chi a'r benthyciad cynhaliaeth mae gennych hawl iddo, a gallai achosi gordaliad y bydd rhaid ei ad-dalu (gweler yr adran goblygiadau ariannol am wybodaeth).

Os ydych yn bwriadu gwneud ad-daliad ar eich benthyciad myfyrwyr, byddem yn argymell eich bod yn aros i chi dderbyn eich llythyr sy’n cadarnhau a ydych wedi cael gordaliad gan Gyllid Myfyrwyr. Os gwneir taliad cyn derbyn y llythyr hwn, ni fydd y swm yn cael ei ddidynnu o gyfanswm eich gordaliad.

Ffioedd Dysgu

Os ydych yn gohirio'ch astudiaethau neu'n tynnu'n ôl o'ch cwrs, bydd swm y ffioedd dysgu y bydd rhaid i chi ei dalu'n dibynnu ar eich dyddiad ymgysylltu olaf. Yn gyffredinol, rhennir y swm taladwy fel a ganlyn:

TYMOR 1 - 25%                 TYMOR 2 - 50%                    TYMOR 3 - 100%

*Mae cyllid am ffioedd dysgu'n gyfyngedig i hyd eich cwrs ac un flwyddyn ychwanegol. Cyfeiriwch at y gwymplen Rheol +1 i wirio faint o'ch dyraniad rydych chi wedi'i ddefnyddio.

Cyllid Cynhaliaeth

Cyfrifir swm y cyllid cynhaliaeth mae gennych hawl iddo yn ystod blwyddyn anghyflawn ar sail pro rata, gan ddefnyddio’r dyddiad olaf y gwnaethoch ymgysylltu â’r cwrs. Er enghraifft, os ydych wedi derbyn £1000 o gyllid cynhaliaeth am dymor a bod eich dyddiad ymgysylltu olaf union hanner ffordd drwy’r tymor, eich gordaliad fydd £500.

Os hysbysir myfyriwr ei fod wedi derbyn gordaliad ac os nad yw'n gallu ei ad-dalu, dylai gymryd un o'r camau canlynol, gan ddibynnu ar ei amgylchiadau:

Tynnu'n Ôl  - Siarad â Chyllid Myfyrwyr i drefnu ad-daliadau misol fforddiadwy (neu i atal y cyfrif nes bod modd gwneud hyn)

Gohirio  - Fel uchod, ond dylai myfyrwyr sy'n gohirio sylwi y bydd unrhyw ordaliad nad yw wedi cael ei ad-dalu erbyn iddynt ailafael yn eu hastudiaethau yn cael ei ddidynnu o'u hawl i gyllid yn y dyfodol.

Os ydych yn gohirio'ch astudiaethau oherwydd rhesymau meddygol sydd wedi effeithio ar eich gallu i astudio, bydd angen i chi ddarparu tystiolaeth feddygol i'r Brifysgol a fydd wedyn yn gallu cofnodi eich bod wedi gohirio am resymau meddygol.

Yn y sefyllfa hon gallech gael caniatâd i gadw hyd at 60 diwrnod ychwanegol o gyllid o'ch dyddiad ymgysylltu diwethaf gan cwmni Cyllid Myfyrwyr, ond argymhellir eich bod yn cysylltu â darparwr eich cyllid i wirio ei fod wedi gweithredu hyn.

Os teimlwch fod rhywbeth y tu hwnt i'ch rheolaeth wedi cael effaith niweidiol sylweddol ar eich perfformiad academaidd neu eich gallu i astudio a bu'n rhaid i chi ohirio'ch astudiaethau neu ail-wneud y flwyddyn o ganlyniad, mae'n bosib y cewch wneud cais am gyllid ychwanegol ar sail Rhesymau Personol Anorchfygol.

Gall y rhain gynnwys materion sy'n ymwneud ag iechyd, anabledd, problemau teuluol neu brofedigaeth, ond nid yw'r rhestr hon yn gynhwysfawr.

Canllaw CPR

Os credwch fod hyn yn berthnasol i chi, anfonwch e-bost at money.campuslife@abertawe.ac.uk. Bydd cynghorydd yn rhoi cyngor ar eich achos a'r dystiolaeth y bydd ei hangen ac yn darparu cymorth cam wrth gam.

*Does dim sicrwydd y byddwch yn derbyn cyllid ychwanegol gan mai penderfyniad eich darparwr cyllid fydd hyn.

ASTUDIAETH ACHOS 1

Mae David yn penderfynu tynnu'n ôl o'i gwrs hanner ffordd drwy'r tymor yn ystod ei ail flwyddyn oherwydd nad yw'n mwynhau ei gwrs.

ASTUDIO BLAENOROL - Nid yw David wedi astudio ar lefel addysg uwch cyn y cwrs hwn. Gan fod David wedi cwblhau blwyddyn un a chofrestru ar Flwyddyn 2, mae wedi defnyddio dwy flynedd o astudio. Os penderfyna David ddychwelyd i astudio ar lefel addysg uwch yn y dyfodol, didynnir y ddwy flynedd hyn o'i hawl gyfan. Er enghraifft, pe bai David yn dychwelyd i astudio cwrs tair blynedd, byddai ganddo hawl i bedair blynedd o gyllid (tair blynedd ei gwrs ac un flwyddyn ychwanegol) ond byddai'n derbyn dwy flynedd o gyllid yn unig (4 blynedd - 2 flynedd o astudio blaenorol = 2 flynedd). Caiff y blynyddoedd hyn o gyllid eu dyrannu i ran olaf y cwrs. Mae hyn yn golygu y byddai angen i David dalu am flwyddyn gyntaf ei gwrs newydd ei hun oherwydd y byddai'n derbyn cyllid am ei drydedd flwyddyn a'i ail flwyddyn. Fel arfer, ni fydd blynyddoedd o astudio blaenorol yn effeithio ar fenthyciadau cynhaliaeth.

GOBLYGIADAU ARIANNOL - Bydd ar David ddyled gyfwerth â 25% o'r ffioedd am y flwyddyn academaidd hon.  Bydd yn ad-dalu'r swm hwn pan fydd yn ennill mwy na'r cyflog trothwy.

Mae David wedi derbyn ei gyllid cynhaliaeth ar gyfer y tymor cyntaf.  Wrth iddo adael hanner ffordd drwy'r tymor, bydd gan David ordaliad sy'n cael ei gyfrifo ar sail pro-rata o'i ddyddiad ymgysylltu diwethaf.  Er enghraifft, pe bai David yn derbyn £1000 am y tymor a'i ddyddiad ymgysylltu olaf oedd union hanner ffordd drwodd, byddai gordaliad David yn £500.  Gan fod David yn tynnu'n ôl, byddai angen talu'r gordaliad hwn yn ôl ar unwaith.  Fodd bynnag, gall David gysylltu â'r Cwmni Benthyciadau Myfyrwyr i drefnu cynllun talu.

ASTUDIAETH ACHOS 2

Mae angen i Sam ohirio ei hastudiaethau oherwydd rhesymau meddygol yn nhrydydd tymor Blwyddyn 1.

ASTUDIO BLAENOROL - Nid yw Sam wedi astudio ar lefel addysg uwch cyn y cwrs hwn. Mae Sam wedi defnyddio un flwyddyn o'i hawl i gyllid - byddai hyn yn cael ei ystyried fel defnyddio ei blwyddyn ychwanegol o gyllid. Felly, byddai gan Sam hawl i gyllid am weddill ei chwrs o hyd. Pe bai angen i Sam ddefnyddio blwyddyn arall yn y dyfodol, er enghraifft, o ganlyniad i ail-wneud elfen o'i chwrs neu ohirio astudiaethau, gallai wneud cais am gyllid dewisol ar sail rhesymau personol anorchfygol am fod rhesymau meddygol wedi ei gorfodi i ohirio.

GOBLYGIADAU ARIANNOL - Bydd ar Sam ddyled ar gyfer 100% o'i ffioedd am y flwyddyn academaidd hon, a bydd hi'n ad-dalu'r swm hwnnw pan fydd hi'n ennill dros y cyflog trothwy.

Mae Sam wedi derbyn ei chyllid cynnal a chadw am ei thrydydd tymor.  Gan fod Sam yn gohirio ar sail feddygol, bydd hi'n cael ei rhoi i gadw hyd at 60 diwrnod ychwanegol o gyllid o'i dyddiad ymgysylltu diwethaf.  Felly, cyfrifir gordaliad Sam o'r dyddiad sy'n dilyn 60 diwrnod o'r dyddiad y cyrhaeddodd ddiwethaf.  Os oes gordaliad o hyd ar ôl y 60 diwrnod, bydd y swm hwnnw'n cael ei ddidynnu o gyllid cynhaliaeth Sam yn y flwyddyn academaidd y mae'n ei dychwelyd.