Addasiadau Rhesymol

Beth yw addasiad rhesymol?

Mae gan bob darparwr addysg ddyletswydd i wneud addasiadau rhesymol rhagweladwy er mwyn osgoi gwahaniaethu yn erbyn myfyrwyr anabl. Ein nod yw parhau i ddatblygu Abertawe fel prifysgol gynhwysol a hygyrch drwy weithredu cymorth ac arferion sy'n cefnogi'r ethos hwn. Mae hyn wedi cynnwys darparu technoleg gynorthwyol ar y campws, dulliau addysgu ac asesu cynhwysol a dylunio hygyrch ar gyfer adeiladau newydd.

Fodd bynnag, pan fydd myfyriwr anabl o dan anfantais sylweddol o'i gymharu â myfyrwyr nad ydynt yn anabl, mae'r ddyletswydd i gymryd camau rhesymol i ddileu'r anfantais honno'n parhau. Mae'r term 'rhesymol' yn cyfeirio at - cymaint ag sy'n briodol neu'n deg. Mae'r hyn a ystyrir yn 'addasiad rhesymol' yn dibynnu ar amgylchiadau unigol. Er enghraifft, gallai fod angen newidiadau penodol i'r ffordd y caiff cynnwys addysgu ei ddarparu a/neu ei asesu, ystyried yr amserlennu a'r mynediad at yr amgylchedd ffisegol, a darparu cyfarpar cynorthwyol.

Mae Disability Rights UK yn darparu rhagor o wybodaeth am addasiadau i fyfyrwyr anabl.

Pa fathau o addasiadau rhesymol sydd ar gael?

Dyma enghreifftiau o addasiadau:

Lleoliad hygyrch
Defnyddio ystafell fach
Amser ychwanegol i orffen asesiadau
Darllenydd, trawsgrifydd neu dechnoleg gynorthwyol
Mynediad at gyfrifiadur personol
Cwestiynau arholiad yn y fformat mwyaf addas i chi
Adborth a marciau yn y fformat cywir i chi
Ystyriaeth am sillafu, gramadeg ac atalnodi

Defnyddio bathodynnau ar gyfer arholiadau a gwaith i’w asesu

Mae gan y Brifysgol bolisi lle gall myfyrwyr ag angen a nodwyd ddewis bod canllawiau marcio yn cael eu cymhwyso i’w llyfrynnau arholi a’u gwaith cwrs fel y caiff sillafu, gramadeg ac atalnodi eu hystyried.

Beth yw ffurflen addasiad rhesymol?

Dy ffurflen yw'r ddogfen rydym ni'n ei defnyddio er mwyn cyfleu dy addasiadau rhesymol i dy Goleg a/neu'r Swyddfa Arholiadau.

Ble bydd yn cael ei rhannu?

Bydd yn cael ei rhannu'n ddiogel â'n Cyswllt Anabledd yn dy Goleg, a chaiff yr wybodaeth ei hanfon at yr aelodau staff perthnasol ar sail yr angen i wybod yn unig. Rydym ni'n gofyn i dy Goleg a'r Swyddfa Arholiadau i weithredu'r addasiadau sydd wedi'u manylu ar y ffurflen, a chysylltu â ni os oes ymholiadau ynghylch dy anghenion.

Rydym yn rhannu dy wybodaeth â’th gydsyniad di yn unig. Er mwyn dysgu rhagor, darllena Ddatganiad Preifatrwydd y Gwasanaethau Cymorth Cynhwysol i Fyfyrwyr.

Beth dylwn i ei wneud â hi?

Byddi di hefyd yn derbyn copi o dy ffurflen ac rydym ni'n awgrymu y dylet ti gadw hwn fel cofnod, rhag ofn y bydd angen i ti gyfeirio at dy addasiadau ar unrhyw adeg yn ystod dy astudiaethau. Caiff dy ffurflen ei hanfon at dy gyfrif e-bost myfyriwr.

Arholiadau

Mae gan y Swyddfa Arholiadau system optio allan ar gyfer rhoi darpariaethau ar waith, lle bydd ein darpariaethau'n cael eu cymhwyso'n awtomatig i arholiadau byddwch chi'n eu sefyll wyneb yn wyneb yn ystod eich amser ym Mhrifysgol Abertawe, oni bai eich bod chi'n trefnu fel arall yn y Swyddfa Arholiadau.

Gallwch chi drefnu i gwrdd â'r Swyddfa Arholiadau o hyd os hoffech chi drafod eich darpariaethau er nad yw hyn yn orfodol bellach; ewch i'w tudalennau gwe am ragor o wybodaeth.

Trefnir addasiadau ar gyfer profion yn yr ystafell ddosbarth yn eich Cyfadran. Os nad ydych chi'n siŵr beth sy'n digwydd cyn prawf, hoffwn ni eich annog i wirio gyda Thîm Cymorth Myfyrwyr eich Cyfadran.

Adolygu

Nid yw dy ffurflen yn sefydledig ac mae modd ei hadolygu ar unrhyw adeg, am resymau megis:

Newid diagnosis a/neu symptomau
Diagnosis ychwanegol
Fformat a gweithgareddau gwaith cwrs/asesu nad oeddet yn gwybod amdanynt i ddechrau
Cyfleoedd blwyddyn dramor/mewn diwydiant/lleoliad gwaith

Pa dystiolaeth ategol y mae ei hangen ar gyfer ffurflen addasiadau rhesymol?

Anableddau a Chyflyrau Tymor Hir

Bydd angen tystiolaeth o anabledd neu gyflwr iechyd corfforol/meddyliol tymor hir, megis epilepsi neu iselder ysbryd, wedi'i darparu gan ymarferydd iechyd proffesiynol (megis meddyg teulu neu seiciatrydd). Dylai'r dystiolaeth gynnwys manylion am yr agweddau allweddol canlynol:

Diagnosis/diagnosis gweithio neu ddisgrifiad o’r anawsterau
Hyd neu'r dyddiad y dechreuodd y cyflwr
Effaith ar weithgareddau o ddydd i ddydd a/neu allu i astudio

Cyflyrau'r Sbectrwm Awtistig

Bydd angen i dystiolaeth o Gyflwr y Sbectrwm Awtistig, megis Syndrom Asperger, gael ei darparu gan ymarferydd iechyd proffesiynol (megis meddyg teulu neu seiciatrydd) neu bydd angen adroddiad asesu diagnostig llawn wedi'i gwblhau gan Seicolegydd Addysgol. Mae'r Brifysgol yn cydnabod Cyflyrau'r Sbectrwm Awtistig fel cyflyrau gydol oes, felly byddwn yn derbyn tystiolaeth o ddiagnosis a wnaed ar unrhyw oedran. Dylai'r dystiolaeth gynnwys manylion am yr agweddau allweddol canlynol:

Diagnosis/diagnosis gweithio neu ddisgrifiad o anawsterau
Hyd neu'r dyddiad y dechreuodd y cyflwr
Effaith ar weithgareddau o ddydd i ddydd a/neu allu i astudio

Anawsterau Dysgu Penodol

Bydd angen i dystiolaeth o anhawster dysgu penodol, megis dyslecsia, gael ei darparu ar ffurf adroddiad asesu diagnostig llawn wedi'i gwblhau naill ai gan Seicolegydd Addysgol neu Athro Arbenigol sy'n meddu ar dystysgrif ymarfer gyfredol.

Dylai'r adroddiad ddefnyddio'r fformat a'r profion a argymhellir yng Nghanllawiau'r Gweithgor Anawsterau Dysgu Penodol. Mae rhagor o wybodaeth am hyn ar gael gan y gwasanaeth Anableddau
Dylech gysylltu â Chydlynydd Anghenion Addysgol Arbennig eich ysgol i ofyn am gasglu tystiolaeth neu, os ydych eisoes wedi cofrestru ym Mhrifysgol Abertawe, cysylltwch â'r gwasanaeth Anableddau am ragor o gyngor ar drefnu adroddiad diagnostig.