Diben
Awdur: Oliver Wilkins
Mewn adolygiad o lenyddiaeth, dylech seilio eich dadl ar y llenyddiaeth ei hun, drwy ddarparu dadansoddiad manwl o'r 'sgwrs' ynghylch eich pwnc. Fel arfer, pan fyddwch yn cael aseiniad i adolygu llenyddiaeth, bydd yn rhaid i chi ateb cwestiwn neu bwnc ond peidiwch â meddwl mai ysgrifennu traethawd am y mater(ion) yn unig yw'r dasg hon.
Diben adolygiad llenyddiaeth yw dangos eich dealltwriaeth o bwnc drwy nodi dadleuon a thueddiadau mawr rhwng awduron a/neu ysgolion o feddwl, a sefydlu pa syniadau a dulliau sydd fwyaf arwyddocaol iddo. Dylai hefyd gynnwys dadl, a nodi bylchau a chyfyngiadau yn y llenyddiaeth i ddangos pam mae eich ymchwil yn bwysig a sut mae'n llenwi'r bylchau hyn.
Ymchwil a Chynllunio
Dylai eich arweinydd academaidd roi syniad i chi o faint o ffynonellau y mae’n disgwyl i chi eu hadolygu, ond gallwch bob amser ofyn iddo am gyngor ac edrych ar adolygiadau llenyddiaeth eraill yn eich maes i gael ysbrydoliaeth. Yn union fel unrhyw aseiniad arall, defnyddiwch yr allweddeiriau o'ch traethawd neu gwestiynau ymchwil i chwilio am astudiaethau.
Er mwyn sicrhau bod eich adolygiad yn berthnasol, trafodwch ymchwil o'r cyfnod amser sy'n 'gyfredol' yn eich maes yn unig. Wrth ddarllen y llenyddiaeth a ddewiswch, ceisiwch ateb y cwestiynau hyn:
- Beth yw'r prif syniad?
- Pa bwyntiau sy'n cael eu defnyddio i ddatblygu hyn?
- Pa dystiolaeth sy'n cael ei defnyddio?
- Beth sy'n ategu'r honiadau hyn?
- Ydych chi’n cytuno?
- Beth yw'r cryfderau a'r gwendidau?
- Ydy awduron eraill yn herio neu'n cytuno?
- Beth yw'r fethodoleg?
- Pa mor berthnasol yw hyn i'm hymchwil fy hun?
Strwythur
Yn union fel traethawd nodweddiadol, dylai adolygiad o lenyddiaeth gynnwys cyflwyniad, paragraffau â thema a chasgliad, ond mae pob adran wedi'i strwythuro ychydig yn wahanol.
Cyflwyniad (tua 10% o'r cyfrif geiriau cyffredinol):
Yn debyg i'r rhan fwyaf o draethodau, dylai cyflwyniad adolygiad llenyddiaeth nodi diben yr aseiniad, sefydlu'r cysyniadau allweddol a gosod disgwyliadau ar gyfer y darllenydd.
- Datganiad o ddiben beth yw'r cwestiwn rydych yn bwriadu ei ateb? Sut mae'n cyd-fynd â'ch maes?
- Cyfiawnhewch eich cwestiwn: pam mae'n bwysig a sut bydd yn cyfrannu at wybodaeth yn eich maes?
- Cwmpas yr adolygiad: rhowch ychydig o wybodaeth am y llenyddiaeth y byddwch chi'n ei hadolygu a pham y gwnaethoch chi ei dewis.
- Cyfeirio: mapiwch strwythur y prif gorff, gan gynnwys y thema neu'r cysyniad sydd wrth wraidd pob adran.
- Cyfyngiadau'r adolygiad: a yw swm y llenyddiaeth yn ei gwneud hi'n anodd adolygu'r pwnc? A oes materion nad ydych wedi cael cyfle i'w trafod?
Paragraffau'r prif gorff:
Wrth ymchwilio a chynllunio, dylech ddod o hyd i themâu at ddiben grwpio'r llenyddiaeth. Dylai pob adran o'r prif gorff adolygu un thema benodol ac, er y gallwch gymharu â llenyddiaeth o adrannau eraill, dylech gadw trafodaeth o bob astudiaeth mewn adran neilltuedig. Dylai pob paragraff neu adran fod â:
- Brawddeg(au) pwnc: cyflwynwch thema'r adran a'r astudiaethau a fydd yn cael eu trafod ynddi.
- Disgrifiad: tynnwch sylw at honiadau'r astudiaethau sydd fwyaf perthnasol i'r traethawd neu’r cwestiwn/cwestiynau ymchwil.
- Dadansoddiad: cymharwch a chyferbynnwch dueddiadau, prif ganfyddiadau, dadleuon a dulliau'r testunau.
- Gwerthusiad: ystyriwch gryfderau a chyfyngiadau'r testunau, efallai gwnewch awgrymiadau a fyddai'n eu gwella, a nodwch fylchau yn y maes.
- Pontio: cyflwynwch yr adran nesaf a dangos sut mae'n gysylltiedig â hon
Casgliad (tua 10% o'r cyfrif geiriau cyffredinol):
Fel y rhan fwyaf o draethodau, mae casgliad adolygiad llenyddiaeth yn crynhoi ac yn pwysleisio eich prif bwyntiau, felly ni ddylai gynnwys unrhyw wybodaeth na chraffter newydd.
- Brawddeg(au) pwnc: nodwch mai dyma ddiwedd yr aseiniad a chyfeiriwch yn ôl at y traethawd neu'r cwestiwn/cwestiynau ymchwil.
- Crynodeb: crynhowch y barnau allweddol rydych chi wedi'u mynegi a'r bylchau rydych chi wedi'u canfod yn y maes.
- Datganiad cloi: rhowch ddatganiad terfynol sy'n profi eich bod wedi cwblhau amcan(ion) yr aseiniad, edrychwch tuag at ddyfodol y maes ac, os yw'n berthnasol, dangoswch sut mae hyn yn cysylltu â'ch traethawd ymchwil.
