Polisi ar Amgylchiadau Esgusodol

Mae'r Brifysgol Abertawe yn cydnabod y gall ystod o ffactorau, gan gynnwys amgylchiadau esgusodol, effeithio ar astudio a pharatoadau myfyriwr ar gyfer asesiad ar adegau, ac weithiau ni fydd myfyrwyr yn gallu cwblhau asesiadau.

Mae gan y polisi canlynol ddau brif bwrpas:

• Sicrhau bod myfyrwyr sydd â hawl dilys o ran amgylchiadau esgusodol yn cael eu trin yn deg ac yn gyson; a 
• Diogelu safon cymwysterau'r Brifysgol.

Mae'r polisi hwn yn ddilys ar gyfer pob myfyriwr yn y Brifysgol sy'n dilyn rhaglen a addysgir (gan gynnwys y rhai hynny sy'n astudio ar raglen gydweithredol gyda sefydliad partner) neu elfen hyfforddi gradd ymchwil, ac yn caniatáu ystyried amgylchiadau esgusodol sy’n ymwneud ag arholiadau a gwaith cwrs.

Mae Prifysgol Abertawe wedi ymrwymo i hyrwyddo cydraddoldeb, amrywiaeth a chynhwysiant yn ein holl weithgareddau, prosesau a’n diwylliant. Bydd yr holl weithdrefnau'n cydymffurfio â Deddf Cydraddoldeb 2010.

Bydd staff Prifysgol Abertawe hefyd yn ymwybodol o Bolisi Cydraddoldeb, Amrywiaeth a Chynhwysiant y Brifysgol a deddfwriaeth cydraddoldeb gyfredol drwy'r hyfforddiant maent yn ei dderbyn. Wrth benderfynu pa gamau gweithredu y dylid eu cymryd mewn perthynas ag amgylchiadau esgusodol, dylai staff/pwyllgorau sicrhau eu bod wedi ystyried a yw ystyriaethau cydraddoldeb yn cael unrhyw effaith ar yr achos ac ystyried hyn wrth wneud eu hargymhellion. Mewn perthynas â phwyllgorau sy'n gwneud penderfyniadau, mae Prifysgol Abertawe'n ymdrechu i gyflawni ei hymrwymiadau i gydraddoldeb hiliol a chydbwysedd rhwng y rhywiau, fel y’u nodir yn y Cynllun Cydraddoldeb Strategol.

Seilir Polisi'r Brifysgol ar Amgylchiadau Esgusodol sy'n Effeithio ar Asesu ar yr egwyddorion canlynol:

i) Pwrpas unrhyw asesiad yw mesur cyflawniad, nid potensial (h.y. yr hyn y mae myfyriwr wedi'i wneud, nid yr hyn y mae ganddo'r potensial i'w wneud).

ii) Mae gan bob myfyriwr gyfrifoldeb unigol am gyflwyno gwaith cwrs ar amser, ac am ymbresenoli ar yr amser ac yn y man priodol ar gyfer asesiadau sydd wedi'u hamserlennu (gan gynnwys arholiadau ysgrifenedig, arholiadau/asesiadau ar-lein, arddangosiadau, cyflwyniadau ac arholiadau ymarferol neu arholiadau yn y labordy) ac am roi gwybod i'r Gyfadran/Ysgol/Sefydliad Partner Cydweithredol academaidd am unrhyw amgylchiadau esgusodol drwy gyflwyno gwybodaeth a dogfennaeth am amgylchiadau o'r fath.

Cyfrifoldeb y myfyriwr yw datgan unrhyw amgylchiadau esgusodol mewn modd amserol (fel arfer CYN y dyddiad cau/dyddiad yr arholiad) i ganiatáu cyfle i'r Brifysgol/Sefydliad Partner Cydweithredol ymateb mewn modd priodol i'r amgylchiadau hynny. Fel arfer, ni chaiff cais am amgylchiadau esgusodol ei gyflwyno ynghynt na 10 niwrnod gwaith cyn dyddiad cyflwyno cyhoeddedig yr asesiad. Dylai myfyriwr sy'n poeni na fydd yn gallu sefyll asesiad a/neu gyflwyno gwaith erbyn y dyddiad cyflwyno gysylltu â'i Gyfadran/Ysgol i gael cyngor.

iii) Bydd y Cyfadrannau/Ysgolion/Sefydliad Partner Cydweithredol academaidd yn ystyried ffyrdd o gynorthwyo myfyrwyr yn ddifrifol er mwyn cynorthwyo myfyrwyr i oresgyn amgylchiadau a allai fel arall effeithio'n andwyol ar asesiadau.

iv) Bydd y Brifysgol/Sefydliad Partner Cydweithredol yn ymateb mewn modd teg a chyfiawn i unrhyw amgylchiadau esgusodol nad oes modd eu datrys yn ddigonol cyn yr asesiad perthnasol.

v) Nid ystyrir bod amgylchiadau esgusodol yn sail i newid marciau a ddyfernir ar gyfer asesiadau sydd eisoes wedi'u cwblhau.

vi) Ni fydd y Brifysgol yn cyfyngu ar sawl gwaith y gall myfyrwyr gyflwyno cais am amgylchiadau esgusodol ar gyfer arholiad neu asesiad penodol. Caiff pob cais ei ystyried ar sail y ffeithiau unigol ac ni chaiff cais ei wrthod fel arfer dim ond oherwydd bod y myfyrwyr wedi cael uchafswm nifer yr ymgeisiau a ganiateir yn unol â'r rheoliadau am arholiad neu asesiad neu wedi cyrraedd y cyfnod cofrestriad arferol hiraf am ei gwrs.

Fodd bynnag, pan gyflwynir sawl cais yn ystod yr un flwyddyn academaidd, caiff Cyfadrannau/Ysgolion drafod â'r myfyriwr y posibilrwydd o ohirio ei astudiaethau, gan gyfeirio at yr amgylchiadau penodol sy'n effeithio ar y myfyriwr. Gohirio Astudiaethau - Rhaglenni a Addysgir - Prifysgol Abertawe.

Gall fod achosion eithriadol pan fydd amgylchiadau myfyriwr yn gymhellol ond ni fydd y cais yn cael ei gymeradwyo oherwydd nad oes gan y myfyriwr obaith realistig o gwblhau ei raglen neu ennill dyfarniad ymadael (os yw'n berthnasol ar gyfer y rhaglen honno). Er enghraifft, efallai fod myfyriwr eisoes wedi rhoi sawl cynnig ar asesiad ond nid yw wedi pasio unrhyw gredydau na gwneud unrhyw gynnydd yn academaidd, gyda'r holl opsiynau cymorth rhesymol ar waith neu efallai fod myfyriwr wedi cyrraedd y cyfnod cofrestru hwyaf arferol ar gyfer ei gwrs, neu efallai, ym marn academaidd Prifysgol Abertawe/y Partner Cydweithredol, nad oes ganddo unrhyw obaith rhesymol o gwblhau ei gwrs o fewn yr amserlen honno (ac nid yw'n debygol o gwblhau os caniateir mwy o amser) o ystyried ei gynnydd hyd yn hyn.

vii) Caiff pob cais am amgylchiadau esgusodol ei ystyried yn gyfrinachol a bydd gwybodaeth ond yn cael ei rhannu â'r aelodau staff hynny y mae'n ofynnol iddynt wneud penderfyniad. Pan fydd myfyriwr o'r farn bod ei amgylchiadau o natur sensitif iawn, dylid nodi hyn ar y ffurflen gais a chaiff tystiolaeth o'r fath ei hystyried gan y sawl sy'n gwneud penderfyniadau yn unig.

viii) Yn eithriadol, gellir ystyried cais heb dystiolaeth ategol os gall myfyriwr roi esboniad priodol o ran pam na ellir darparu tystiolaeth o'r fath. Caiff ceisiadau o'r fath eu hystyried â chydymdeimlad.

ix) Caiff Amgylchiadau Esgusodol eu hystyried gan Bwyllgor Amgylchiadau Esgusodol/Pwyllgor priodol yr Ysgol a/neu gan aelodau staff profiadol sydd wedi'u hyfforddi'n briodol o blith staff academaidd a gwasanaethau proffesiynol.

Diffinnir Amgylchiadau Esgusodol fel problemau neu ddigwyddiadau difrifol a sydyn, sydd y tu hwnt i allu myfyriwr i'w rheoli neu eu rhagweld, a allai fod wedi effeithio ar berfformiad y myfyriwr a/neu a allai fod wedi effeithio ar allu myfyriwr i fynychu, cwblhau, neu gyflwyno asesiad ar amser. Yr unig amgylchiadau esgusodol perthnasol yw'r rhai sy'n bwrw amheuaeth ar ddilysrwydd cyflwyniad myfyriwr fel mesur cywir o'i allu. Dylai'r Gwasanaeth Lles ac Anabledd gefnogi anabledd/cyflyrau iechyd hirdymor (gan gynnwys y rhai sy'n gysylltiedig â lles/iechyd meddwl), mewn ymgynghoriad â'r Gyfadran/yr Ysgol a'r myfyriwr (gweler y Canllawiau i Gyfadrannau/Ysgolion/Sefydliad Partner Cydweithredol ar gyfer ymdrin â myfyrwyr ag amgylchiadau esgusodol a/neu ofynion penodol).

3.1.1

Mae'r rhestr ganlynol yn rhestr, nad yw'n gyflawn, o amgylchiadau sydd yn annhebygol o gael eu derbyn fel amgylchiadau esgusodol dilys:

• Mân anhwylderau neu afiechydon (a fyddai mewn sefyllfa waith yn annhebygol o arwain at absenoldeb o'r gwaith) sy'n effeithio ar waith paratoi'r myfyriwr ar gyfer asesiad. Gallai enghreifftiau gynnwys annwyd, pen tost, mân ddamwain neu fân anaf.
• Cyflwr meddygol honedig heb naill ai 1) tystiolaeth resymol (feddygol neu fel arall) i'w gefnogi neu 2) esboniad boddhaol o ran pam nad yw'r myfyriwr wedi gallu darparu tystiolaeth ategol annibynnol ar adeg cyflwyno'r cais.
• Problemau ariannol, gan gynnwys effaith cyflogaeth am dâl.
• Sgiliau rheoli amser gwael.
• Rhwymedigaethau cymdeithasol ac ymrwymiadau tebyg eraill y gellir eu hosgoi, er enghraifft: gwyliau, priodas, parti, apwyntiad meddygol rheolaidd.
• Ffactorau astudio y gellir eu hosgoi, megis: methiant cyfrifiadurol, argraffydd yn methu, dyddiadau cau’n cyd-daro, nodiadau coll. Er enghraifft, cyflwyno'r ffeil anghywir yn ddamweiniol ar gyfer asesiad ar-lein, gan mai cyfrifoldeb y myfyriwr yw sicrhau bod y fersiwn gywir yn cael ei chyflwyno.
• Symud tŷ neu ddigwyddiadau eraill wedi'u cynllunio, neu y gellid bod wedi'u disgwyl yn rhesymol.
• Camddarllen yr amserlen arholiadau.
• Fel arfer, ni dderbynnir materion sy'n ymwneud â fisâu o dan unrhyw amgylchiadau.
• Mân-ddigwyddiadau bywyd oni bai bod yr amgylchiadau wedi cael effaith anghymesur ar y myfyriwr.

3.1.2

Dyma restr nad yw'n gynhwysfawr o amgylchiadau a fyddai fel arfer yn cael eu hystyried yn amgylchiadau esgusodol a allai effeithio ar berfformiad:

• Salwch difrifol, damwain, neu broblem les sy'n analluogi’r myfyriwr, neu ddirywiad annisgwyl mewn problem hirdymor. Disgwylir i chi ddarparu ardystiad meddygol a ddylai fod yn amlwg yn berthnasol i'r cyfnod yn union cyn y dyddiad asesu.
• Mân glefyd neu anhwylder sy'n effeithio ar y myfyriwr ar ddiwrnod yr arholiad/asesiad am gyfnod penodol a amserlennir, neu'n syth cyn y rheini. Gallai enghreifftiau gynnwys mân ddamweiniau neu anafiadau. Disgwylir i chi ddarparu ardystiad meddygol a ddylai fod yn amlwg yn berthnasol i'r dyddiad asesu neu gyfnod byr yn union cyn y dyddiad asesu.
• Pan nad oes modd i fyfyriwr fod yn bresennol mewn asesiad neu sefyll asesiad oherwydd covid-19. Fel arfer, disgwylir i chi ddarparu ardystiad meddygol neu brawf o ganlyniad prawf positif a ddylai fod yn amlwg yn berthnasol i'r dyddiad asesu neu gyfnod byr yn union cyn y dyddiad asesu.
• Ymprydio crefyddol sy'n effeithio'n sylweddol ar iechyd ac yn atal myfyriwr rhag sefyll arholiad/asesiad.
• Gorbryder neu straen â diagnosis/wedi'i asesu sy'n ymwneud ag arholiadau/asesiadau a gefnogir naill ai gan dystysgrif feddygol neu brofforma addasu. Dylai tystiolaeth gyfeirio'n glir at y dyddiad asesu neu'r cyfnod byr cyn y dyddiad asesu.
• Salwch hirdymor, anghenion penodol, anableddau sydd wedi'u datgelu a'u hasesu gan y Brifysgol/Sefydliad Partner Cydweithredol
• Caiff y profforma addasu ei dderbyn fel tystiolaeth gefnogi.
• Symptomau clefyd heintus a allai fod yn andwyol pe byddai'n cael ei drosglwyddo i eraill. Disgwylir i chi ddarparu ardystiad meddygol a ddylai fod yn amlwg yn berthnasol i'r dyddiad asesu neu gyfnod byr yn union cyn y dyddiad asesu.
• Marwolaeth neu salwch difrifol perthynas agos neu ffrind. Rhaid darparu tystiolaeth ategol annibynnol.
• Amgylchiadau personol/teulu andwyol o bwys – megis ysgariad, lladrad, tân, achos llys mawr, bod yn dyst i ddigwyddiad trawmatig neu gael profiad ohono, anawsterau ariannol y tu hwnt i reolaeth y myfyriwr. Rhaid darparu tystiolaeth ategol annibynnol.
• Ffactorau eithriadol eraill sydd wedi effeithio'n sylweddol ar y myfyriwr. Rhaid darparu tystiolaeth annibynnol ategol.
• Myfyrwyr rhan-amser sy'n cael eu rhyddhau mewn blociau, neu fyfyrwyr dysgu o bell yn unig – newid sylweddol anrhagweledig ym mhatrwm eu cyflogaeth. Fel arfer, dylid darparu tystiolaeth ategol annibynnol.
• Argyfwng neu argyfwng sy'n atal y myfyriwr rhag bod yn bresennol mewn arholiad neu asesiad cyfnod penodol neu gyrchu'r rheini. Fel arfer, dylid darparu tystiolaeth ategol annibynnol.
• Ymosodiad/trais rhywiol. Fel arfer, dylid darparu tystiolaeth ategol annibynnol.
• Troseddau Casineb. Fel arfer, dylid darparu tystiolaeth ategol annibynnol.
• Argyfwng llety megis troi allan gorfodol neu gartref nad oes modd byw ynddo. Fel arfer, dylid darparu tystiolaeth ategol annibynnol.
• Gwaharddiad a orchmynnwyd gan y Brifysgol.
• Amgylchiadau eithriadol yn ymwneud â gwaith grŵp, nad yw'r Ysgol eisoes wedi'u hystyried (e.e. pan fo'r grŵp cyfan wedi cael ei effeithio gan amgylchiadau y tu hwnt i'w reolaeth, neu os yw aelod unigol o'r grŵp yn cael anawsterau ac felly nid yw'n gallu cyfrannu'n effeithiol.) Fel arfer, dylid darparu tystiolaeth ategol annibynnol.
• Cyflyrau sy’n ymwneud â beichiogrwydd a geni babi (gan gynnwys bod yn bartner yn ystod geni babi). Fel arfer, dylid darparu tystiolaeth ategol annibynnol.
• Fel arfer, dim ond methiant offer TG a ddarperir gan Brifysgol Abertawe/Sefydliad Partner Cydweithredol (pan fo tystiolaeth gymhellol ar gael i gadarnhau’r methiant honno) sy'n effeithio ar system neu systemau, ac sy'n cyfyngu ar gyfle'r myfyriwr i gyflwyno gan gynnwys y canlynol, ond heb fod yn gyfyngedig iddynt:
  • Fethiant gan y feddalwedd goruchwylio o bell
  • Diffoddiad WiFi lleol heb ei gynllunio
  • Amser anweithredol ar y Llwyfan Dysgu Digidol (neu elfennau ohono) heb ei gynllunio

Tystiolaeth (gyda dyddiadau ac amseroedd yn gwbl weladwy) a allai fod ar ffurf sgrinluniau o darfiadau i’r gwasanaeth, gwallau, tudalen darparwyr rhwydwaith neu gyfathrebiadau sy’n amlinellu’r tarfiad, gan gynnwys postiadau ar y cyfryngau cymdeithasol ac e-byst gan ddarparwyr neu systemau monitro. Er hynny, mae'n rhaid i fyfyrwyr gadw copi o'u gwaith wrth gefn a bod yn barod i'w gyflwyno erbyn y dyddiad cau a gyhoeddwyd, gan drefnu amser wrth gefn ar gyfer problemau technegol posib ar y munud olaf a sicrhau eu bod yn rhoi gwybod am y mater i'r aelod(au) staff perthnasol cyn gynted â phosib.

• Cyfrifoldebau gofalu ac anawsterau domestig sy’n effeithio ar allu’r myfyriwr i baratoi ar gyfer asesiad neu ei gwblhau. Bydd pasbort y gofalwr yn cael ei ystyried yn dystiolaeth; fel arall dylid darparu tystiolaeth ategol annibynnol.

3.2

Fel arfer, dylid darparu dogfennaeth annibynnol i gadarnhau unrhyw honiadau o amgylchiadau eithriadol. Lle bydd tystiolaeth wreiddiol wedi'i chyflwyno mewn iaith ar wahân i Gymraeg neu Saesneg, rhaid i'r myfyriwr ddarparu cyfieithiadau Saesneg sydd wedi'u hardystio. 

Rhaid darparu tystiolaeth o’r fath gyda dyddiad o fewn mis o’r asesiad/arholiad dan sylw, gan nodi sut mae’r amgylchiadau wedi effeithio ar berfformiad myfyriwr a/neu sut y gallant fod wedi bod yn rhwystr i’r myfyriwr wrth fynychu, cwblhau neu gyflwyno asesiad ar amser. Os na chaiff dogfennaeth ategol ei darparu, bydd y cais yn cael ei wrthod oni bai y gall y myfyriwr ddarparu esboniad boddhaol yn ei gais pam na fu modd iddo ddarparu tystiolaeth o'r fath.

3.2.1

Dyma restr anghyflawn o enghreifftiau o dystiolaeth briodol:

• (*Dylai'r meddyg fod wedi ei gofrestru gyda'r corff rheoleiddiol cenedlaethol priodol (e.e y Cyngor Meddygol Cyffredinol) neu fod â statws cyfatebol. Os nad yw’r meddyg wedi ei gofrestru gyda’r Cyngor Meddygol Cyffredinol, neu os nad oes ganddo statws cyfatebol, gellir gofyn am ragor o dystiolaeth, fel y bo'n briodol.)
• Yn achos myfyriwr sy'n mynd yn sâl yn ystod arholiad sy'n cael ei oruchwylio ar un o safleoedd y Brifysgol, copi o adroddiad y goruchwyliwr. (Dylid darparu tystiolaeth feddygol ar y cyd â hyn pryd bynnag y bydd modd ). Rhaid i fyfyriwr sy’n mynd yn sâl yn ystod arholiad ar y safle hysbysu’r goruchwyliwr naill ai yn ystod yr arholiad neu’n uniongyrchol wedi hynny a chyn gadael lleoliad yr arholiad. Bydd y goruchwyliwr yn gwneud cofnod a chaiff y myfyriwr weld y cofnod hwnnw yn y Swyddfa Arholiadau/Sefydliad Partner Cydweithredol. Mewn achos o'r fath, gellir defnyddio adroddiad y goruchwyliwr i gefnogi cais am ohirio, er y dylai myfyrwyr hefyd gasglu tystiolaeth feddygol os yw hynny'n bosibl.
• Llythyr derbyn a rhyddhau o'r ysbyty – i gadarnhau'r cyfnod yn yr ysbyty. Rhaid i'r llythyr gynnwys enw'r myfyriwr a bydd angen i'r Pwyllgor fod yn fodlon bod y llythyr yn ymwneud â'r myfyriwr.
• Llythyr gan wasanaeth sy'n cefnogi'r myfyriwr, e.e. Y Gwasanaeth Lles ac Anabledd, Swyddog Cyswllt Trais Rhywiol (SVLO), Canolfan Atgyfeirio Ymosodiadau Rhywiol (SARC), Cwnselydd, Canolfan Gyngor Prifysgol Abertawe (SUAC), gwasanaeth cymorth myfyrwyr cyfatebol yn y Sefydliad Partner Cydweithredol neu asiantaeth arall a all fod yn cefnogi myfyriwr etc. (wedi'i ddarparu yn ôl doethineb y gwasanaeth cymorth).
• Yn achos pryder/straen ynghylch arholiadau wedi'i ddiagnosio/nodi, ardystiad meddygol neu ffurflen addasiad.
• Yn achos myfyrwyr nad ydynt yn gallu dod i asesiad neu sefyll asesiad oherwydd covid-19, fel arfer disgwylir iddynt ddarparu ardystiad meddygol neu brawf o ganlyniad prawf positif a dylai'r rheini fod yn berthnasol yn glir i'r dyddiad asesu neu gyfnod byr yn union cyn y dyddiad asesu.
• Yn achos myfyrwyr sydd â chyflyrau iechyd/anableddau anwadal sydd wedi cael eu cymeradwyo gan y Gwasanaeth Lles ac Anabledd neu gan wasanaeth cymorth myfyrwyr cyfatebol yn y Sefydliad Partner Cydweithredol, ystyrir bod y ffurflen addasiad yn dystiolaeth.
• Naill ai tystysgrif marwolaeth, Trefn y Gwasanaeth, llythyr gan Drefnydd Angladdau, ysgrif goffa neu adroddiad newyddion. Pan nad yw'r rhain ar gael, llythyr o gefnogaeth gan aelod o'r teulu, ffrind neu diwtor personol. Yn achos salwch difrifol a/neu farwolaeth perthynas agos (sy'n cael ei ddiffinio fel rhiant/prif ofalwr yr ymgeisydd, chwaer neu frawd, partner/partner priod, plentyn/dibynnydd yr ymgeisydd), bydd tystiolaeth o'r farwolaeth/salwch difrifol yn ddigonol a chymerir yn ganiataol fod y salwch/farwolaeth wedi effeithio ar y myfyriwr.
• Adroddiad gan yr heddlu – ni fydd rhif cyfeirnod y drosedd/rhif digwyddiad gan yr heddlu ar ei ben ei hun yn ddigonol.
• Erthygl newyddion sy'n cadarnhau anawsterau teithio annisgwyl.
• Yn achos cyfrifoldebau gofalu tymor byr ac anawsterau domestig sy'n effeithio ar allu myfyriwr i baratoi ar gyfer asesiadau neu gynnal asesiadau, datganiad gan aelod o'r teulu/ffrind.
• Yn achos cyfrifoldebau gofal hirdymor, pasbort gofalwr neu dystiolaeth ategol annibynnol.

Mewn achosion lle nad yw’n bosib/priodol i fyfyriwr gael tystiolaeth annibynnol am ei amgylchiadau, gall y myfyriwr wneud datganiad yn fuan wedi’r digwyddiad a’i gyflwyno. Fodd bynnag, rhaid i fyfyriwr esbonio pam nad yw hi’n bosib cael tystiolaeth annibynnol.

Gall y Brifysgol/Sefydliad Partner Cydweithredol gysylltu â darparwr tystiolaeth (e.e. meddyg (meddyg teulu)) i wirio tystiolaeth myfyriwr. Mewn achosion o'r fath, bydd y Brifysgol/Sefydliad Partner Cydweithredol fel arfer yn cael caniatâd y myfyriwr i gysylltu â'r darparwr tystiolaeth.

3.2.2

Mae’r canlynol yn rhestr nad yw’n gynhwysfawr o enghreifftiau o dystiolaeth nad yw fel arfer yn cael ei derbyn:

• Hunan-ardystiad o amgylchiadau.
• Tystiolaeth gan barti nad yw'n annibynnol.
• Tystiolaeth ôl-weithredol ar gyfer cyflwr meddygol pan nad oedd y myfyriwr wedi ymgynghori â meddyg teulu ar adeg ei salwch.
• Llythyr gan riant, partner, aelod o'r teulu neu gyd-fyfyriwr sy'n dilysu amgylchiadau lle nad oes unrhyw dystiolaeth ategol annibynnol arall.
• Tystiolaeth mewn iaith heblaw Cymraeg/Saesneg, heb gyfieithiad ardystiedig i gyd-fynd â hi.
• Rhif cyfeirnod trosedd heb adroddiad atodol yr heddlu.
• Sgrinluniau o ddyfeisiau symudol yn dangos gwybodaeth gyfyngedig.
• Tystiolaeth nad yw'n ddarllenadwy, hynny yw, geiriau wedi pylu, wedi’i thocio, gwybodaeth wedi'i hepgor, heb ddyddiad, tystiolaeth wedi'i sganio'n wael.

Bydd y marciau a ddyrennir yn adlewyrchiad cywir o’r perfformiad ac ni chânt eu newid yn hwyrach ar sail amgylchiadau esgusodol. Gellir rhoi cyfle ychwanegol i fyfyriwr nad yw'n gallu sefyll arholiad neu gwblhau aseiniad oherwydd amgylchiadau esgusodol ymgymryd ag asesiad, o bosibl heb ei gapio (yn amodol ar ddarparu'r dystiolaeth briodol).

Tybir bod myfyriwr sy'n mynychu a/neu sy'n cwblhau aseiniad ac nad ydyw'n cyflwyno ceisiadau am amgylchiadau esgusodol o fewn 5 niwrnod gwaith o ddyddiad yr asesiad gwreiddiol yn cadarnhau:

• Nad oes rhesymau pam na ddylen nhw fod wedi ymgymryd â’r asesiad ar yr adeg honno;
• Na fydd yn cyflwyno cais am gonsesiwn yn ddiweddarach oherwydd amgylchiadau esgusodol; a
• Bod unrhyw geisiadau am ‘addasiadau rhesymol’ yn sgîl anabledd, cyflwr iechyd, lles neu broblem iechyd meddwl neu ofynion penodol eraill eisoes wedi’u cyflwyno i’r Brifysgol/Sefydliad Partner Cydweithredol.

Gall Ysgol/Sefydliad Partner Cydweithredol roi i fyfyriwr sydd wedi cyflwyno cais am amgylchiadau esgusodol amser ychwanegol y tu hwnt i ddyddiad cau estynedig yr asesiad y cytunwyd arno i gyflwyno tystiolaeth (gellir rhoi uchafswm o 10 niwrnod gwaith ar ôl y dyddiad cau cyflwyno gwreiddiol er mwyn cyflwyno tystiolaeth ategol) i gefnogi'r cais am amgylchiadau esgusodol. Ni fydd myfyriwr sy'n ymgymryd ag asesiad gan wybod bod amgylchiadau esgusodol wedi effeithio arno fel arfer yn gallu cyflwyno cais am amgylchiadau esgusodol yn llwyddiannus yn ddiweddarach.

Yn achos tarfu ar arholiadau/asesiadau neu broblemau gydag arholiad/asesiad sy'n effeithio ar grŵp o fyfyrwyr, gall Pwyllgor Amgylchiadau Esgusodol yr Ysgol neu Bwyllgor priodol argymell camau gweithredu priodol.

Yr Ysgol sy'n gyfrifol am gyflwyno'r modiwl y mae'r asesiad dan sylw yn cyfrannu ato fydd yn ystyried ceisiadau am amgylchiadau esgusodol sy'n ymwneud ag asesu a addysgir (arholiadau yn bersonol/o bell a/neu waith cwrs). 

Yn achos rhaglen gydweithredol, y sefydliad partner fydd yn ystyried ceisiadau am amgylchiadau esgusodol. Bydd yr Ysgol/Sefydliad Partner Cydweithredol yn cael eu cyfarwyddo gan egwyddorion 2, 3 a 4 y polisi hwn.

Mae'n ofynnol i fyfyrwyr lenwi'r ffurflen amgylchiadau esgusodol briodol a ddarperir a chyflwyno'r ffurflen wedi'i llenwi, ynghyd â'r dystiolaeth annibynnol ategol briodol.

5.1 Penderfynu ar Geisiadau

Bydd Pwyllgor Amgylchiadau Esgusodol yr Ysgol neu'r Gyfadran neu enwebai dynodedig priodol y Pwyllgor yn penderfynu ar un o'r canlynol:

• Mae cais dilys wedi'i wneud a chytunir ar un o'r opsiynau canlynol:
• Dyfarnu estyniad o 5 niwrnod gwaith i'r dyddiad cau cyflwyno (sy'n berthnasol i waith cwrs). 
• Cynnig ymgais arall (heb ei gapio neu wedi'i gapio, fel y bo'n briodol) yn y cyfnod asesu priodol nesaf (sy'n berthnasol i waith cwrs ac arholiadau)
• Dod i'r casgliad nad oes unrhyw sail, neu nad oes sail ddigonol, i gais y myfyriwr.

Pan na fydd un o'r camau gweithredu uchod yn briodol oherwydd natur yr asesiad, gall Pwyllgor Amgylchiadau Esgusodol yr Ysgol/Cyfadran neu'r Pwyllgor priodol argymell yn eithriadol i'r Bwrdd Dilyniant a Dyfarniadau:

• Ganiatáu diystyru elfen fach o'r gwaith cwrs neu'r asesiad yn ystod y flwyddyn, gan ailgyfrif y marc(iau) terfynol yn seiliedig ar elfennau'r gwaith cwrs neu'r asesiad sy'n weddill yn ystod y flwyddyn; neu
• Ymdrin â'r sefyllfaoedd hynny lle mae cydran o'r modiwl ar goll trwy ganiatáu i'r marc(iau) terfynol gael ei/eu (h)ailgyfrif o gydran/cydrannau'r modiwl sy'n weddill; neu
• Ystyried cymryd cam gweithredu arall

Ymdrinnir ag amgylchiadau esgusodol sy'n effeithio ar gyflwyno'r dysgu annibynnol dan gyfarwyddyd, ar gyfer myfyrwyr meistr a addysgir, trwy weithdrefnau ar wahân. 

5.2 Asesu ar y safle/o bell

Dylai myfyriwr â nam dros dro a allai olygu bod sefyll arholiad ar y safle yn anodd iddo gysylltu â Chydlynydd y Modiwl/Asesu neu’r Swyddog Arholiadau priodol a Swyddfa Arholiadau’r Brifysgol yn y Gwasanaethau Addysg oherwydd y gallai fod yn briodol rhoi trefniadau arbennig ar waith i alluogi’r myfyriwr i sefyll yr arholiad. Gall hyn gynnwys caniatáu i'r myfyriwr sefyll yr asesiad mewn ystafell lai o faint, neu ddefnyddio ysgrifennydd (sgrifellwr), defnyddio cyfrifiadur, neu addasiadau priodol eraill.

Yn achos rhaglen gydweithredol, y sefydliad partner fydd yn ystyried ceisiadau am amgylchiadau esgusodol.

Mewn achosion lle nad yw trefniadau arbennig o'r fath yn briodol, dylid defnyddio'r polisi amgylchiadau esgusodol yn lle.

Os caiff yr amgylchiadau esgusodol eu derbyn fel rhai dilys mewn perthynas â'r arholiad yn bersonol /o bell, cynigir cyfle arall i sefyll yr arholiad yn y cyfnod asesu priodol nesaf (Cyfnod Asesu Semester Un, prif gyfnod asesu Semester Dau neu'r Cyfnod Asesu Atodol ar gyfer rhaglenni a addysgir). Os mai 'ymgais gyntaf' oedd yr arholiad, pan fyddwch yn cael cyfle arall i wneud arholiad, caiff hynny ei ystyried yn achos gohirio ac ni chaiff y marciau eu capio’. Os oedd yr arholiad yr effeithiwyd arno'n arholiad ailsefyll, tybir bod y cyfle a ohirir yn arholiad ailsefyll hefyd a bydd y marc a ddyfernir wedi'i gapio (os yw capio'n berthnasol). Os bydd y myfyriwr wedi rhoi cynnig ar yr arholiad dan sylw cyn y caniateir gohiriad, ni roddir marc am y cais gwreiddiol.

5.3 Amserlen ar gyfer penderfyniadau

Bydd myfyrwyr yn cael gwybod am ganlyniad cais am amgylchiadau esgusodol mewn modd amserol ac fel arfer o fewn 10 niwrnod gwaith ar ôl cyflwyno'r cais.

5.4 Hysbysiad am y canlyniad

Rhoddir gwybod i fyfyrwyr am ganlyniad eu cais yn ysgrifenedig. Dylai'r hysbysiad am y canlyniad hefyd gynnwys rhesymau manwl dros y penderfyniad yn ogystal â chyngor ynghylch pwy dylai'r myfyriwr gysylltu ag ef os bydd yn cael rhagor o anawsterau o ran yr asesiad.

5.5 Ceisiadau sy’n cael eu gwrthod

Os bydd yr Ysgol/Sefydliad Partner Cydweithredol/yn gwrthod cais am amgylchiadau esgusodol mewn perthynas ag arholiad neu waith cwrs (yn unol â'r gweithdrefnau a amlinellir yn 5.1 a 5.2), cymerir y camau gweithredu canlynol:

• Os na wnaed ymgais ar yr arholiad, cofnodir marc o 0% (absenoldeb heb awdurdod) ar gyfer yr arholiad a phenderfynir ar ganlyniad terfynol y myfyriwr yn unol â'r gweithdrefnau asesu ar gyfer y rhaglen astudio; neu
• Os rhoddwyd cynnig ar yr arholiad, caiff y papur ei farcio, gwneir cofnod o'r marc a phenderfynir ar ganlyniad terfynol y myfyriwr yn unol â'r gweithdrefnau asesu ar gyfer y rhaglen astudio.

5.6 Amgylchiadau esgusodol sy’n effeithio ar y Cyfnod Asesu Atodol

Fel arfer, ni fydd cyfle pellach i gynnal asesiadau rhwng y cyfnod Asesu Atodol a dechrau'r flwyddyn academaidd nesaf. Dylid ystyried amgylchiadau esgusodol yn unol â 5.1 uchod.

Lle penderfynir bod cais yn ddilys, a chymeradwyir ymgais arall yn y cyfnod asesu priodol nesaf, dylid cyflwyno argymhelliad gerbron Bwrdd Dilyniant a Dyfarniadau'r Brifysgol i'w ystyried yng ngoleuni perfformiad cyffredinol y myfyriwr. Er enghraifft, gellid rhoi cyfle pellach i fyfyriwr ailadrodd y modiwl a fethwyd heb i'r marciau gael eu capio yn y sesiwn ddilynol yng ngoleuni'r amgylchiadau esgusodol. Fodd bynnag, ni chaiff myfyriwr symud ymlaen i'r lefel astudio nesaf/rhan nesaf o'i astudiaethau na chymhwyso ar gyfer dyfarniad oherwydd cais am amgylchiadau esgusodol os na fydd wedi bodloni'r meini prawf ar gyfer dilyniant neu ddyfarniad. Ym mhob achos, bydd y rheoliadau arferol ar gyfer dilyniant neu ddyfarniad yn weithredol.

5.7 Y Coleg, Prifysgol Abertawe – Penderfyniadau ynghylch gohirio

Caiff penderfyniadau ynghylch gohirio ar gyfer myfyrwyr Y Coleg, Prifysgol Abertawe eu gwneud gan Bwyllgor Amgylchiadau Esgusodol Y Coleg, Prifysgol Abertawe.

Caiff penderfyniad a wnaed gan Bwyllgorau Amgylchiadau Esgusodol Ysgolion (neu bwyllgor priodol arall) neu'r Bwrdd Achosion Myfyrwyr (neu enwebai'r Bwrdd), mewn perthynas ag amgylchiadau esgusodol eu hanfon at y Bwrdd Dilyniant y Dyfarnu priodol fel argymhelliad. Bydd y Bwrdd Dilyniant y Dyfarnu'n ystyried unrhyw argymhelliad mewn perthynas â phroffil academaidd cyffredinol y myfyriwr a'r gweithdrefnau asesu. Fel arfer y rheoliadau asesu sydd â'r flaenoriaeth.  

Bydd unrhyw fyfyriwr sy'n cyflwyno tystiolaeth anghywir neu ffug i gefnogi cais am amgylchiadau esgusodol, a hynny'n fwriadol, yn agored i gamau disgyblu yn unol â Gweithdrefnau Camymddygiad Academaidd y Brifysgol Abertawe.

Ni fydd apeliadau yn erbyn penderfyniadau gan Bwyllgorau Amgylchiadau Esgusodol Ysgolion (neu Bwyllgor priodol arall), neu'r Bwrdd Achosion Myfyrwyr (neu enwebai'r Bwrdd), mewn perthynas ag amgylchiadau esgusodol fel arfer yn cael eu hystyried.

Mewn achosion lle mae myfyriwr yn teimlo bod anghysondebau wedi bod wrth ddilyn y gweithdrefnau, dylai’r myfyrwyr gysylltu â’r Gyfadran/Ysgol yn y lle cyntaf. Yn achos rhaglenni cydweithredol,  dylai'r Sefydliad Partner gadw cofnodion cywir a chymesur o geisiadau am amgylchiadau esgusodol a chanlyniadau'r rhain.

Mewn achosion lle mae myfyriwr yn cael tystiolaeth newydd sy’n berthnasol i gais a gyflwynwyd eisoes, gall y myfyriwr ailgyflwyno’r dystiolaeth newydd i’r Gyfadran/Ysgol i’w hailystyried, ar yr amod bod hyn o fewn y dyddiadau a nodwyd.

Dim ond mewn achosion lle mae'r dystiolaeth feddygol a gyflwynwyd yn cefnogi'r awgrym nad oedd y myfyriwr mewn sefyllfa i wybod a oedd yn ffit i ymgymryd ag asesiad neu i baratoi gwaith i'w asesu y bydd y Brifysgol yn derbyn cais am amgylchiadau esgusodol a gyflwynir ar ôl y dyddiad cau. Dylid rheoli hawliadau o’r fath yn unol â'r Weithdrefn Apeliadau Academaidd. Gofynnir i'r Ysgol wneud sylwadau ar achosion o'r fath.

Bydd Cyfadrannau/Ysgolion yn cadw cofnodion cywir a chymesur o geisiadau a chanlyniadau amgylchiadau esgusodol. Yn achos rhaglenni cydweithredol,  dylai'r Sefydliad Partner gadw cofnodion cywir a chymesur o geisiadau am amgylchiadau esgusodol a chanlyniadau'r rhain.

Cyfrifoldeb y Bwrdd Achosion Myfyrwyr yw monitro'r data a gwneud argymhellion fel y bo'n briodol.

Cyfrifoldeb y Bwrdd Rheoliadau, Ansawdd a Safonau hefyd fydd adolygu’r Polisi hwn a’i effeithiolrwydd gan wneud argymhellion ar gyfer newidiadau i’w hystyried gan y Senedd, fel y bo’n briodol.

Ymdrinnir â'r holl wybodaeth a ddarperir gan fyfyriwr wrth ategu cais am Amgylchiadau Esgusodol yn gyfrinachol. Drwy gyflwyno cais am amgylchiadau esgusodol, mae'r myfyriwr yn cytuno i Brifysgol Abertawe/y Sefydliad Partner Cydweithredol gadw ei ddata personol at ddibenion prosesu cais am amgylchiadau esgusodol. Caiff y data hwn ei gadw yn unol â’i hysbysiad o dan y Rheoliad Cyffredinol ar Ddiogelu Data a Deddfau Diogelu Data eraill a Pholisi Cadw Cofnodion y Brifysgol.