Graddau Meistr Ôl-raddedig a Addysgir Hyblyg

Bydd y rheoliadau hyn yn berthnasol i raglenni (amser llawn a rhan-amser) sy'n arwain at ddyfarnu graddau Meistr: MA, MSc, LLM, MBA, MFin.

1.1

Caiff Graddau Meistr, Diplomâu a Thystysgrifau Ôl-raddedig eu dyfarnu i fyfyrwyr sydd wedi dangos:

• Dealltwriaeth systematig o wybodaeth ac ymwybyddiaeth feirniadol o broblemau presennol a/neu ddealltwriaeth newydd y mae llawer ohoni wrth wraidd eu disgyblaeth academaidd, eu maes astudio neu eu maes ymarfer proffesiynol neu’n cael ei llywio ganddi.
• Dealltwriaeth gynhwysfawr o dechnegau sy'n berthnasol i'w hymchwil neu eu ysgolheictod uwch eu hunain.
• Gwreiddioldeb wrth gymhwyso gwybodaeth, ynghyd â dealltwriaeth ymarferol o sut mae technegau ymchwil ac ymholi sefydledig yn cael eu defnyddio i greu a dehongli gwybodaeth yn y ddisgyblaeth.
• Dealltwriaeth gysyniadol sy'n galluogi'r myfyriwr i:
• werthuso’n feirniadol ymchwil ac ysgolheictod uwch presennol yn y ddisgyblaeth;
• gwerthuso methodolegau a datblygu beirniadaeth ohonynt, a lle bo'n briodol, gynnig damcaniaethau newydd

Fel arfer, bydd deiliaid y cymhwyster yn gallu:

• Ymdrin â materion cymhleth yn systematig ac yn greadigol, gwneud penderfyniadau cadarn yn absenoldeb data cyflawn, a chyfleu eu casgliadau’n glir i gynulleidfaoedd arbenigol ac anarbenigol.
• Dangos hunangyfeirio a gwreiddioldeb wrth ymdrin â phroblemau a'u datrys, a gweithredu’n annibynnol i gynllunio a chwblhau tasgau ar lefel broffesiynol neu gyfatebol.
• Parhau i ddatblygu eu gwybodaeth a'u dealltwriaeth, a datblygu sgiliau newydd i lefel uchel.

A bydd gan y deiliaid:

Y rhinweddau a'r sgiliau trosglwyddadwy angenrheidiol ar gyfer cyflogaeth sy'n gofyn am:

• arfer menter a chyfrifoldeb personol;
• gwneud penderfyniadau mewn sefyllfaoedd cymhleth ac ansicr;
• y gallu i ddysgu’n annibynnol sy’n ofynnol ar gyfer datblygiad proffesiynol parhaus

A bydd deiliaid yn datblygu priodoleddau graddedigion drwy gydol y daith academaidd sydd â chysylltiadau amlwg â gyrfaoedd yn y dyfodol:

• cymhwysedd proffesiynol a disgyblaethol
• y gallu i fynd i'r afael â heriau byd-eang
• cyfathrebu effeithiol
• meddwl yn arloesol
• arweinyddiaeth gydweithredol.

2.1

Mae strwythur rhaglenni Graddau Meistr a Addysgir Hyblyg fel a ganlyn:

• Rhaglen astudio amser llawn neu ran-amser sy'n cynnwys modiwlau gwerth cyfanswm o 180 credyd, lle ceir dysgu annibynnol dan gyfarwyddyd (gwerth 60 credyd) ar yr un pryd â modiwlau a addysgir.
• Bydd myfyrwyr yn gymwys i ddechrau eu dysgu annibynnol dan gyfarwyddyd ar unrhyw adeg ar ôl cofrestru.
• Bydd myfyrwyr amser llawn a rhan-amser sy'n cwblhau'r rhaglen yn llwyddiannus yn gymwys i gael gradd Meistr.

2.2

Bydd myfyrwyr amser llawn fel arfer yn cwblhau'r rhaglen mewn blwyddyn. Bydd myfyrwyr rhan-amser fel arfer yn cwblhau'r rhaglen mewn dwy flynedd (rhaglen dwy flynedd) a thair blynedd (rhaglen tair blynedd). Bydd myfyrwyr sy’n astudio ar-lein yn unig yn cwblhau’r rhaglen fel arfer mewn dwy flynedd (rhan-amser).  

2.3

Bydd y rhaglen ran-amser 2 flynedd yn cael ei chyflwyno yn y fformat canlynol:

• 60 credyd a addysgir ym mhob blwyddyn (120 credyd a addysgir);
• Cyfanswm o 60 credyd dysgu dan gyfarwyddyd annibynnol a gyflwynir erbyn diwedd y rhaglen, fel arfer naill ai drwy un modiwl 60 credyd a asesir yn ffurfiol ym mlwyddyn dau, neu fodiwl 30 credyd ym mhob blwyddyn.

Caiff y rhaglen ran-amser dwy flynedd sy'n cael ei hastudio ar-lein yn unig, ei haddysgu yn y fformat canlynol: 

• 120 o gredydau a addysgir dros 15 mis
• Cyfanswm o 60 o gredydau o ddysgu annibynnol dan gyfarwyddyd wedi'u cwblhau erbyn diwedd y rhaglen, fel arfer drwy fodiwl unigol 60 o gredydau dros naw mis.
• Ar gyfer rhaglenni ar-lein yn unig, bydd myfyrwyr amser llawn fel arfer yn cwblhau'r rhaglen mewn 15 mis. Bydd myfyrwyr rhan-amser yn cwblhau'r rhaglen mewn 24 mis fel arfer.

2.4

Mae gan rai rhaglenni ddulliau cyflwyno gwahanol, gan gynnwys e.e. cyflwyno mewn blociau byr, dysgu cyfunol, dysgu ar-lein yn unig. Ceir manylion am hyd, strwythur a dull rhaglenni o'r fath yn llawlyfr y rhaglen dan sylw.

2.5

Bydd deilliannau dysgu’n cael eu nodi ar gyfer pob rhaglen gradd Meistr ac unrhyw raglen y bwriedir iddi ddarparu cymhwyster canolradd neu gymhwyster wrth gefn.

2.6

Caiff rhai rhaglenni eu strwythuro mewn modd sy'n golygu bod yn rhaid i ymgeiswyr ymgymryd ag ymarfer proffesiynol a lleoliadau gwaith. Os bydd cymhwysedd proffesiynol ymgeiswyr yn cael ei asesu ar ôl cyfnod o ymarfer proffesiynol neu leoliad gwaith, rhaid dyfarnu credydau am y canlyniad.

3.1

Bydd modiwlau a addysgir yn cael eu cwblhau yn unol â'r hyn a nodir gan y Gyfadran/Ysgol berthnasol a dylid cwblhau eu hasesu erbyn y dyddiadau a bennir gan y Cyfadrannau/yr Ysgolion. Caiff y rhaglen radd gyfan ei chwblhau o fewn y cyfnodau canlynol o'r dyddiad cofrestru:

 Disgwylir i fyfyrwyr amser llawn fynychu Prifysgol Abertawe yn ystod y rhaglen gyfan (gweler pwynt 1.3 o'r Polisi Goruchwylio Myfyrwyr Meistr Ôl-Raddedig a Addysgir, Prifysgol Abertawe). Ni ddisgwylir i fyfyrwyr amser llawn a rhan-amser sy'n astudio ar raglenni ar-lein yn unig fod yn bresennol ar y campws yn Abertawe. 

*Darllenwch yr Arweiniad ar Derfynau Amser am ragor o wybodaeth.

4.1

Gall y Gyfadran/yr Ysgol ystyried ceisiadau i estyn dyddiad cau cyflwyno'r darn o ddysgu annibynnol dan gyfarwyddyd, hyd at gyfnod byrraf yr ymgeisyddiaeth (fel arfer blwyddyn ar gyfer myfyrwyr amser llawn a dwy flynedd ar gyfer myfyrwyr rhan amser). Rhaid cwblhau estyniadau i ymgeisyddiaeth yn unol â rheoliadau'r Brifysgol, a rhaid eu cyfeirio drwy oruchwyliwr y myfyriwr, i'r Gwasanaethau Addysg yn unol â'r dyddiadau cau a nodwyd.  

 5.1

Y patrwm addysgu ar gyfer y rhan fwyaf o raglenni amser llawn fydd tri semester, a disgwylir i fyfyrwyr astudio 60 o gredydau bob semester. Rhaid i bob myfyriwr gwblhau 60 credyd o ddysgu annibynnol dan gyfarwyddyd o fewn terfyn amser arferol y rhaglen fel y’i nodir yng Nghymal 2.2.

Disgwylir i fyfyrwyr sydd wedi cofrestru ar y rhaglenni rhan-amser dwy flynedd ddilyn 30 o gredydau a addysgir yn Semester Un, a 30 o gredydau a addysgir yn Semester Dau ar gyfer y flwyddyn gyntaf a'r ail flwyddyn. Fel arfer caiff y dysgu annibynnol dan gyfarwyddyd ei gwblhau yn ystod yr ail flwyddyn NEU ei rannu dros Flwyddyn Un a Blwyddyn Dau. 

Disgwylir i fyfyrwyr sydd wedi cofrestru ar y rhaglenni rhan-amser tair blynedd ddilyn 30 o gredydau yn Semester Un a 30 o gredydau yn Semester Dau ar gyfer y Flwyddyn Gyntaf a'r Ail Flwyddyn. Fel arfer caiff y dysgu annibynnol hwn dan gyfarwyddyd ei gwblhau yn ystod Blwyddyn Tri.

5.2

Bydd myfyrwyr sydd wedi cofrestru ar raglenni â strwythurau gwahanol, gan gynnwys addysgu fesul bloc, dysgu cyfunol ac ar-lein yn unig, yn gallu gweld manylion eu strwythur addysgu ac asesu yn llawlyfr y rhaglen.

6.1

Bydd hi’n ofynnol i fyfyrwyr gwblhau’r rhaglen astudio yn unol â’r rheoliadau ynghylch dyfarnu credyd, fel y’u cyhoeddir yn y ddogfen Rheoliadau Asesu graddau Meistr Ôl-raddedig a Addysgir.

6.2

Y marc llwyddo ar gyfer modiwl fydd 50%.

6.3

Rhaid i fyfyrwyr gwblhau'r rhaglen gyfan cyn y gallant fod yn gymwys i gael gradd. Bydd y dysgu annibynnol dan gyfarwyddyd, yn ymgorffori dulliau a chanlyniadau prosiect ymchwil. 

7.1

Os yw myfyriwr yn cael ei dderbyn i raglen gradd Meistr hyblyg, ond nad yw’n gallu symud ymlaen i’w chwblhau neu na chaniateir iddo wneud hynny, gan ddibynnu ar nifer y credydau a enillodd erbyn iddo ymadael ac yn amodol ar ofynion unrhyw gorff proffesiynol neu statudol, efallai y bydd yn cymhwyso am un o ddyfarniadau canlynol y Brifysgol**:

* Gall rhaglenni fabwysiadu rheoliadau digolledu llymach o ganlyniad i ofynion Cyrff Proffesiynol/Statudol neu Gyrff Noddi.

** Pan fo dysgu blaenorol wedi cael ei gydnabod, ni fyddai cymwysterau ymadael fel arfer yn cael eu dyfarnu.

7.2

Ni fydd Tystysgrif Ôl-raddedig mewn pwnc a enwir yn cael ei dyfarnu ar ôl i fyfyriwr gwblhau modiwlau sy’n cynnig o leiaf 60 o gredydau ar lefel 7 oni bai bod y modiwlau perthnasol yn gwneud rhaglen gymeradwy. Bydd Bwrdd perthnasol y Brifysgol yn cymeradwyo rhaglen dystysgrif dan y rheoliad hwn.

8.1

Cwblheir pob ymgeisyddiaeth trwy gyflwyno darn neu ddarnau o ddysgu annibynnol dan gyfarwyddyd, a chymeradwyo'r fath waith gan yr arholwyr.

9.1

Bydd y Gyfadran/yr Ysgol yn cymeradwyo un goruchwyliwr ar gyfer pob ymgeisyddiaeth.

9.2

Caiff myfyrwyr eu goruchwylio yn unol â'r Polisi Goruchwylio ar gyfer Myfyrwyr Meistr Ôl-raddedig a Addysgir

10.1

Dylai cynigion fod yn ymarferol o ran amserlen ac o ran yr adnoddau sydd ar gael, a dylid penodi goruchwylwyr ag arbenigedd addas ar eu cyfer.

10.2

Dylid caniatáu digon o amser i oruchwylwyr gyflawni eu dyletswyddau, yn enwedig pan fo’r garfan yn fawr.

10.3

Pan fo'n briodol, dylid dilyn arweiniad y Cyngor Ymchwil ynghylch y cyfleusterau i'w darparu ar gyfer myfyrwyr ar y campws a myfyrwyr ar-lein yn unig (lleoedd astudio, llyfrgell, amgylchedd ymchwil priodol etc.)

10.4

Dylid cyhoeddi canllawiau ysgrifenedig ynghylch presenoldeb, fframweithiau ar gyfer cyfarfodydd a disgwyliadau cyffredinol, yn unol â’r Polisi Goruchwylio ar gyfer Myfyrwyr Meistr ôl-raddedig a Addysgir.

10.5

Caiff y modd y gweithredir yr holl ganllawiau hynny ei fonitro’n rheolaidd.

10.6

Os bydd angen cymorth ychwanegol ar fyfyrwyr gyda’u sgiliau iaith, dylid darparu’r cyngor hwn fel gwasanaeth sydd ar wahân i ddyletswyddau’r goruchwyliwr.

10.7

Dylai fod system ar waith sy’n galluogi myfyriwr i ofyn am oruchwyliwr gwahanol, ac sy’n sicrhau bod aelod gwahanol o staff ar gael pe bai unrhyw oruchwyliwr yn absennol am gyfnod hir.

10.8

Dylai nifer y myfyrwyr sy'n cael eu dyrannu i oruchwyliwr fod ar lefel sy'n ei alluogi i gyflawni'n llawn y cyfrifoldebau a nodir yn Adran 11.

11.1

Dylid rhoi cyngor ac arweiniad i’r myfyriwr â’r nod o hwyluso’r broses o greu gwaith sydd o’r safon ofynnol ar gyfer gradd Meistr a Addysgir. 

11.2

Dylai’r cynnig fod o fewn maes arbenigedd y goruchwyliwr, dylid diffinio’r testun a ddewisir mewn ymgynghoriad â’r myfyriwr a’i gymeradwyo gan y Gyfadran/yr Ysgol.

11.3

Dylai fod modd cwblhau’r gwaith a gynigir o fewn y cyfnod a bennir.

11.4

Cytunir ar y cyd â'r Gyfadran/yr Ysgol ar amserlen cyflwyno gwaith. 

11.5

Dylid cynnal o leiaf tri chyfarfod yn unol â'r Polisi Goruchwylio ar gyfer Myfyrwyr Meistr Ôl-raddedig a Addysgir.

11.6

Dylid cytuno cofnod o bob cyfarfod ffurfiol o'r fath gyda'r myfyriwr, gan gynnwys dyddiadau, camau gweithredu y cytunwyd arnynt, a dyddiadau cau a bennwyd. Dylai'r myfyriwr gadw'r cofnod a'i gyflwyno i'r Gyfadran/yr Ysgol wrth gyflwyno'r gwaith.

11.7

Dylai gwaith gael ei ddychwelyd yn unol â’r dyddiadau cau a nodwyd, a dylid rhoi sylwadau adeiladol arno.

11.8

Rhoddir sesiwn adborth i unrhyw fyfyriwr sy’n methu ac sy’n cael caniatâd Bwrdd Dilyniant a Dyfarniadau’r Brifysgol i ailgyflwyno ei waith.

12.1

Yn anad dim, dylai’r gwaith a gynhyrchir fod yn waith y myfyriwr ei hun, er ei fod wedi’i gyflawni â chyngor ac arweiniad gan y goruchwyliwr.        

12.2

Cytunir ar amserlen cyflwyno'r gwaith ar y cyd â Chyfadran/Ysgol gartref y myfyriwr.

12.3

Disgwylir i fyfyrwyr amser llawn fod yn bresennol yn Abertawe yn ystod y rhaglen gyfan (gweler pwynt 1.3 o'r Polisi Goruchwylio ar gyfer Myfyrwyr Meistr Ôl-raddedig a Addysgir Prifysgol Abertawe). Ni ddisgwylir i fyfyrwyr amser llawn a rhan-amser ar raglenni ar-lein yn unig fod yn bresennol yn Abertawe. 

12.4

Dylid mynychu o leiaf dri chyfarfod yn unol â'r Polisi Goruchwylio ar gyfer Myfyrwyr Meistr Ôl-raddedig a Addysgir.

12.5

Dylid cadw cofnod gofalus o bob cyfarfod ffurfiol, a fydd yn cynnwys dyddiadau, y camau gweithredu y cytunwyd arnynt a’r dyddiadau cau a bennwyd, a dylai’r goruchwyliwr a’r ymgeisydd gytuno'r cofnod hwnnw. Yn unol â’r Polisi Goruchwylio ar gyfer Myfyrwyr Meistr Ôl-raddedig a Addysgir, dylid cyflwyno copi o’r cofnod hwn i’r Gyfadran/Ysgol pan gaiff y gwaith ei gyflwyno.

12.6

Dylid cysylltu â’r goruchwylwyr os tybir bod angen cyfarfodydd ychwanegol.

12.7

Dylid cwblhau’r gwaith o fewn y fframwaith y cytunwyd arno, a dylid ysgrifennu cyn gynted ag y bo modd at y goruchwyliwr i’w hysbysu am unrhyw broblem sy’n ymwneud â chyflwyno gwaith yn hwyr (neu gyflwyno gwaith anfoddhaol).

13.1

Bydd gan bob Bwrdd Arholi Graddau Meistr Ôl-raddedig a Addysgir Gadeirydd a fydd yn gyfrifol am sicrhau bod y gweithdrefnau gweinyddol cywir ar gyfer cyflwyno ac arholi’r gwaith yn cael eu dilyn.  

13.2

Caiff yr holl waith ei farcio gan ddau aelod mewnol o staff, a dylai goruchwyliwr y myfyriwr fod yn un ohonynt, fel arfer. Serch hynny, mewn rhai amgylchiadau efallai na fydd hi’n briodol i’r Goruchwyliwr fod yn farciwr.

13.3

Diffinnir rôl yr Arholwr Allanol yng Nghôd Ymarfer Arholi Allanol Prifysgol Abertawe.

13.4

Fodd bynnag, os yw’n amhosibl penodi dau farciwr mewnol, dylai’r Gyfadran/yr Ysgol dalu marciwr allanol i fod yn ail farciwr a dylid gofyn i’r Arholwr Allanol wirio bod cymedroli wedi digwydd.

13.5

Er ei bod yn arferol i’r un Arholwr Allanol arholi ymgeisydd ar gyfer y rhaglen, gellir penodi arholwr annibynnol i arholi’r gwaith os oes angen gwybodaeth arbenigol neu arbenigwr yn y maes.

13.6

Gall Cyfadrannau/Ysgolion ddewis defnyddio rheoliadau samplu os ceir mwy na 10 o ymgeiswyr. Mae’r rheoliadau samplu fel a ganlyn:

• O leiaf 10% o gyfanswm y darnau o waith (lleiafswm o 5) gan gynnwys o leiaf un darn o bob dosbarth (Llwyddo, Teilyngdod, Rhagoriaeth, lle y bo’n briodol).  Yn ogystal â hyn, rhaid anfon pob darn o waith a fethwyd at yr Arholwr Allanol.

13.7

Caiff y marciau eu cymeradwyo yn ystod y Byrddau Dyfarnu (Bwrdd Dilyniant a Dyfarniadau'r Gyfadran/yr Ysgol a’r Brifysgol).

13.8

Gweler y Côd Ymarfer ar gyfer Arholi Allanol am fanylion y weithdrefn ar gyfer ymdrin ag anghydfod neu anghytundeb.

14.1

Rhaid i ddysgu annibynnol dan gyfarwyddyd gael ei gyflwyno'n unol â gofynion y Brifysgol. Caiff Cyfadrannau/Ysgolion ddewis rhwng yr opsiynau canlynol:

• Derbyn copi electronig o'r gwaith.
• Derbyn dau gopi o’r gwaith, mewn rhwymiad meddal, yn ogystal â chopi electronig.

Rhaid i Gyfadrannau/Ysgolion roi gwybod i fyfyrwyr am y dull cyflwyno yn llawlyfr y Gyfadran/yr Ysgol.     

Rhaid i bob copi gynnwys:

• Datganiad sy’n nodi bod y gwaith yn cael ei gyflwyno er mwyn bodloni gofynion y radd yn rhannol.
• Crynodeb o’r gwaith, nad yw’n fwy na 300 o eiriau o hyd.
• Datganiad, wedi’i lofnodi gan y myfyriwr, sy’n dangos i ba raddau y mae’r gwaith a gyflwynir yn ganlyniad gwaith ymchwil y myfyriwr ei hun. Dylid cydnabod ffynonellau eraill mewn troednodiadau sy’n cynnwys cyfeiriadau penodol. Dylid atodi llyfryddiaeth lawn i'r gwaith.
• Datganiad, wedi’i lofnodi gan y myfyriwr, sy’n cadarnhau nad yw’r gwaith wedi’i dderbyn eisoes ar gyfer unrhyw radd, ac nad yw’n cael ei gyflwyno mewn ymgeisyddiaeth am unrhyw radd arall ar yr un pryd â’r radd dan sylw.
• Datganiad wedi'i lofnodi, ynghylch argaeledd y gwaith.

14.2

Bydd cyfarwyddiadau manwl ar gyflwyno gwaith ar gael i myfyrwyr yn y Rheoliadau Academaidd. 

14.3

Diffinnir cyflwyno dysgu annibynnol dan gyfarwyddyd fel cyflwyno darn neu ddarnau o waith yn unol â'r gofynion a nodwyd o ran cyflwyno dysgu annibynnol dan gyfarwyddyd (uchod) a dylai'r gwaith a gyflwynir fodloni’r gofynion hefyd (fformat, uchafswm geiriau etc.) a bennwyd gan y Gyfadran/yr Ysgol.  Mae gan y Gyfadran/yr Ysgol hawl i benderfynu a yw cyflwyniad yn bodloni'r gofynion hyn ai peidio.

14.4

Fel arfer, y dyddiadau ar gyfer cyflwyno'r darn neu ddarnau o ddysgu annibynnol dan gyfarwyddyd fydd: 

*bydd rhaglenni sydd â strwythur annodweddiadol yn nodi'r dyddiad ar gyfer cyflwyno'r darn neu ddarnau o ddysgu annibynnol dan gyfarwyddyd. 

14.5

Caiff Cyfadran/Ysgol bennu dyddiad cau cynharach ar gyfer cyflwyno gwaith, a rhaid i’r dyddiad hwnnw gael ei gyhoeddi yn llawlyfr y Gyfadran/yr Ysgol.  

14.6

Bydd rhaid i fyfyrwyr sydd wedi’u cofrestru yn y Brifysgol nad ydynt yn cyflwyno eu gwaith erbyn y dyddiad cau dynnu'n ôl o'r Brifysgol, a dyfernir Diploma Ôl-raddedig yn gymhwyster ymadael iddynt.

Ni fydd Diploma Ôl-raddedig yn cael ei ddyfarnu pan fydd cyfran helaeth o'r gydnabyddiaeth o ddysgu blaenorol wedi'i derbyn. (Gweler A10)

14.7

Mae gan bob gradd ei chyfnod ymgeisyddiaeth hwyaf posibl (fel yr amlinellir uchod). Bwriad y cyfnod hwyaf posibl yw sicrhau bod myfyrwyr y torrwyd ar draws eu hastudiaethau am ba reswm bynnag yn gallu cwblhau eu gradd.   Rhaid i fyfyrwyr geisio cwblhau eu rhaglen erbyn y dyddiadau cau a nodir yn Rheoliad 3 uchod. Bydd ymgeisyddiaeth yn dirwyn i ben (ac felly ni fydd modd arholi’r myfyriwr) os na chwblheir y rhaglen o fewn y terfynau amser a bennir gan y Brifysgol fel yr amlinellir yn Rheoliad 3.

15.1

Os na fydd yr arholwyr wedi derbyn darn(au) o ddysgu annibynnol dan gyfarwyddyd erbyn y dyddiad cau a bennwyd, caiff y myfyriwr ei ailgyflwyno unwaith yn unig o fewn y terfynau amser canlynol:

*gall Cyfadrannau/Ysgolion bennu cyfnodau ailgyflwyno byrrach os yw'r dysgu annibynnol dan gyfarwyddyd wedi'i rannu'n fodiwlau gwerth llai na 60 o gredydau. Gwneir hyn yn glir i fyfyrwyr yn llawlyfr y Gyfadran/yr Ysgol.

15.2

Bydd y Brifysgol yn codi ffi am ailarholi, a chaiff y marc ei gapio.

15.3

Dylai myfyrwyr sy’n ailgyflwyno gwaith gael adborth ysgrifenedig ar y rhesymau pam y gwnaethant fethu yn union ar ôl i Fwrdd Dyfarniadau a Dilyniant y Brifysgol gadarnhau’r canlyniad. Dylai Cyfadrannau/Ysgolion sicrhau bod yr adborth yn adlewyrchu holl sylwadau’r Arholwyr (Mewnol ac Allanol) a bod y myfyriwr yn cael gwybod am y newidiadau sy’n angenrheidiol.  

15.4

Dim ond mân newidiadau i deitl eu gwaith y caiff myfyrwyr sy’n ailgyflwyno eu gwaith eu gwneud, gyda chaniatâd eu Goruchwyliwr. Ni ddylai newidiadau o’r fath ofyn am ymchwil wreiddiol ychwanegol.

15.5

Bydd yn rhaid i fyfyrwyr sy'n ailgyflwyno eu gwaith barhau i fodloni gofynion y Polisi Monitro Cyfranogiad ar gyfer Myfyrwyr Ymchwil a disgwylir iddynt ymrwymo'n llawn i'w hastudiaethau yn ystod y cyfnod ailgyflwyno. Caiff myfyrwyr eu monitro bob pedair wythnos (un sesiwn adborth ffurfiol i'w dilyn gan un cysylltiad gwirio lles. Ni fydd gan fyfyrwyr hawl i oruchwyliaeth ychwanegol) nes iddynt ailgyflwyno o fewn y terfyn amser a bennir ar gyfer myfyrwyr amser llawn a rhan-amser a gallent wynebu'r broses uwchgyfeirio o hyd ar gyfer diffyg cyfranogiad. Bydd y Gyfadran/yr Ysgol neu'r Gwasanaethau Cydymffurfiaeth Myfyrwyr yn cymryd cyfrifoldeb am gofnodi cyfranogiad myfyrwyr yn ystod y cyfnod ailgyflwyno.    

16.1

Bydd hawl gan fyfyriwr i gyhoeddi'r holl waith neu ran ohono yn ystod ei gyfnod fel myfyriwr cofrestredig yn y Brifysgol, cyn ei gyflwyno'n llawn neu'n rhannol, ar yr amod nad yw'n nodi yn unrhyw le yn y gwaith a gyhoeddir ei fod yn cael ei ystyried am radd uwch. Gellir ymgorffori gwaith o’r fath a gyhoeddwyd wedyn yn y darn o ddysgu annibynnol dan gyfarwyddyd a gyflwynir i'w arholi.

17.1

Er gwaethaf y darpariaethau yn y rheoliadau sy’n ymwneud ag argaeledd dysgu annibynnol dan gyfarwyddyd, gall y Brifysgol gael caniatâd, ar sail argymhelliad arbennig a gymeradwyir gan y Deon Gweithredol yr ymgeisydd neu ei enwebai, i atal unrhyw un rhag llungopïo a/neu gael mynediad at waith ymgeisydd am gyfnod o hyd at bum mlynedd. Cyfrifoldeb goruchwyliwr yr ymgeisydd fydd cyflwyno cais priodol i'r Deon Gweithredol cyn gynted ag y bo’n rhesymol ymarferol. Byddai’r rhwystr hwn hefyd yn berthnasol i aelodau’r Brifysgol.

17.2

Dylai’r crynodeb a’r teitl fod ar gael yn ddirwystr.

17.3

Mae'n rhaid i unrhyw argymhelliad am wahardd mynediad gael ei gyflwyno i'r Deon Gweithredol neu ei enwebai ar ôl ystyried cais gan oruchwyliwr myfyriwr. Cyfrifoldeb y goruchwyliwr fydd cyflwyno’r cais cyn gynted ag sy’n rhesymol ymarferol. Rhaid i’r argymhelliad gynnwys datganiad ynghylch y rhesymau dros wneud y cais. Gwneir y rhan fwyaf o’r ceisiadau hyn ar sail sensitifrwydd masnachol yr ymchwil, a allai fod wedi’i noddi’n rhannol gan gorff masnachol neu ddiwydiannol.

17.4

Pan ganiateir gwahardd mynediad, hysbysir goruchwyliwr y myfyriwr. Yn achos gwaith y tybir ei fod yn berthnasol i Gymru, bydd y Gyfadran/yr Ysgol yn hysbysu llyfrgellydd Llyfrgell Genedlaethol Cymru o’r ffaith y dylid atal mynediad at y gwaith am gyfnod penodol.

17.5

Er y tybir bod y gwaharddiad yn dod i rym cyn gynted ag y cyflwynir y gwaith, caiff y cyfnod a gymeradwywyd ei gyfrifo o’r dyddiad y caiff y myfyriwr ei hysbysu’n ffurfiol gan y Brifysgol ei fod wedi cymhwyso am radd..

17.6

Wrth gyflwyno, bydd yn ofynnol i fyfyriwr gynnwys datganiad wedi’i lofnodi a fydd yn dangos naill ai:

• bod y gwaith, os yw’n llwyddiannus, yn gallu bod ar gael ar gyfer benthyciad rhwng llyfrgelloedd neu i’w lungopïo (yn unol â’r ddeddf hawlfraint), ac y gellir darparu’r teitl a’r crynodeb ar gyfer sefydliadau allanol; neu
• y daw’r gwaith, os yw’n llwyddiannus, ar gael felly ar ddiwedd cyfnod gwaharddiad.

18.1

Bydd y Byrddau Arholi canlynol yn cyfarfod i asesu myfyrwyr:

18.2

Ceir manylion pellach ynghylch cyfansoddiad, rôl a chyfrifoldebau Byrddau Arholi yn y Rheoliadau Asesu ar gyfer Dyfarniadau Ôl-raddedig a Addysgir.

19.1

Dylai un copi gael ei storio gan y Gyfadran/yr Ysgol am gyfnod nad yw’n llai na dwy flynedd. Pan fydd myfyriwr wedi cyflwyno dau gopi â rhwymiad meddal, dylai'r copi arall fod ar gael i'r myfyriwr ei gasglu, oni fernir bod y cynnwys yn berthnasol i Gymru, ac yn yr achos hwnnw dylid ei gadw yn Llyfrgell y Brifysgol.